Сентябры Мӕздӕджы байгом уыдзӕн сывӕллӕтты сфӕлдыстады технопарк «Кванториум».
Ныртӕккӕ дзы цӕттӕгӕнӕн куыстытӕ кӕронмӕ фӕхӕццӕ кӕнынц. Ахуыргӕнджытӕн лекцитӕ кӕсынц зонындзинӕдтӕ фылдӕргӕнӕн курсыты. Уыцы-иу рӕстӕг «Кванториум»-ы кусджытӕ технопарчы ӕвӕрынц алыхуызон ифтонггӕрзтӕ.
Квантумты зондамонджыты бынӕттӕм кӕй райстой, уыцы дӕсны ӕрыгон специалисттӕ Ахуырады рӕзты ног хуызты фонды ӕнӕмӕнг ацӕуынц уӕлӕмхасӕн ахуырад.
— «Кванториум»-ы ӕппӕт зондамонджытӕ хъуамӕ зоной педагогон ӕмӕ техникон компетенцитӕй пайда кӕнын. Уымӕ гӕсгӕ уыцы-иу рӕстӕг ахуырад исынц дыууӕ къабазы дӕр. Дзырд Sottskills амоны «адӕмимӕ кусын зонын». Нӕ алы кусӕг дӕр къорд видеоконференцийы фӕрцы каст фӕци ахуырадон курс. Hard-skills амоны «ифтонггӕрзтӕ ӕмӕ программӕтимӕ куыст». Ныридӕгӕн цыппар зондамонӕджы ӕрбаздӕхтысты уыцы курсытӕй, — зӕгъы «Кванториум»-ы разамонӕг Мурад Джахаев.
Алевтинӕ Чибашвили ӕмӕ Маринӕ Ишкова «Энерджиквантум»-ы ахуырадон курс каст фесты Мӕскуыйы энергетикӕйы ифтонггӕрзтӕ уадзӕг раззаг куыстуаты центрон офисы. Борис Иноземцев «Робототехникӕ»-йы ахуырады курс каст фӕци Мӕскуыйы инновацион центр «Сколково»-йы. Руслан Газимагомедов «Хайтек»-ы зондамонӕджы дӕсныйад райста горӕт Пензӕйы. Куыстмӕ бавналыны агъоммӕ ма ноджыдӕр 10 зондамонӕджы рӕхджы ахуырадон курсытӕ каст фӕуыдзысты.
Сывӕллӕтты ног технопарк «Кванториум» Мӕздӕджы байгом кӕндзысты национ проект «Ахуырад»-ы фӕлгӕты.
Гӕлӕуты Наталья
