Рæстæг æнæрынцойæ тындзы размæ. Кæронмæ фæхæццæ кæны XXI æнусы цыппæрæм хай. Зилы царды цалх дæр, истори та йæ чиныг фыссы. Уыцы азфысты зынгæ бынат ис Ирыстоны кадджындæр хъæутæй иу — Елхотæй рацæуджытæн дæр. Сæ иу — Магкаты-Дзиуаты Хатæхцыхъойы чызг Зойæ — хæсты сывæллæтты фæлтæры минæвар, уарзæгой мад, рæвдауаг нана.
— Адæймаг цалынмæ æрыгон вæййы, уæдмæ йæм афтæ фæкæсы, цыма йын рæстæджы бон æппындæр ницы бауыдзæн, — дзырдта Зойæ, йæ райгуырды 90 азы бонмæ йæм Дзæуджыхъæумæ Елхотæй арфæтæ кæнынмæ чи ссыд, уыцы уазджытæн. Уыдон та уыдысты «Аланты Ныхас»-ы Кировы районы хайады уынаффæдоны сæрдар Къубалты Солтан æмæ ацы районы ветеранты уынаффæдоны сæрдар Бедойты Феликс. Сæххæст кодтой кадджын хæс — схорзæхджын кодтой юбиляры Кировы районы сæргълæууæг Нæкуысаты Барисы къухæвæрдæй фидаргонд Кады гæххæтт æмæ зæрдылдарæн лæварæй.
— Нæ хъæу рагæй æрæгмæ хъуыстгонд уыд æмæ у йæ сахъгуырд фæсивæдæй, куыд лæппутæй, афтæ чызджытæй дæр, — кодта дарддæр йæ ныхас Дзион. — Зæгъæм, мемæ Елхоты астæуккаг скъола каст чи фæцис, уыдонæй иу дæр æгуыдзæгæй нæ баззад. Кæд стыр ахуыргæндтæ нæ систæм, уæддæр стæм иузæрдион нæ райгуырæн хъæуыл, нæ зæдбадæн Ирыстоныл, æгас Уæрæсейыл. Абон дæр ма сæ кæстæрты рæвдауынц Едзойты Хъазыбег, Дзгойты Петкæ, Блаты Раисæ æмæ ма цалдæр ме ‘мкъласоны. Цæрæнт ма бирæ зæрдæрухсæй.
Зойæ царды фæндæгтыл фæцыд уæндонæй. Æртæ азы бакуыста Елхоты ас-
тæуккаг скъолайы ногдзауты раздзогæй. Каст фæцис базарадон техникум, стæй та – фæсаууонмæ Мæскуыйы базарадон институт. Æрвыстой йæ иу бæрнон бынатæй иннæмæ, æмæ алы ран дæр нымад уыдис раззагдæртимæ. Йæ цард баиу кодта йæхи хуызæн бонзонгæ лæппу Магкаты Михалимæ. Мадизæн (Мады-Майрæм) сын балæвар кодта лæппу æмæ чызг. Уыдон дæр сæхи хуызæн рауадысты куыстуарзаг, æгъдауджын, æмгарджын, æцæг ирон гуырдтæ.
Фынддæс азы фæкуыста рухстауæгæй профессионалон уагдоны, фæсивæдæн амыдта базарадон кусæджы дæсныйад. Æмæ дзы абон дæр бузныг сты йæ кæддæры ахуырдзаутæ. Йæ уæды куыстæн ын стыр кад скодта Цæгат Ирыстоны ахуырад æмæ зонады министр Алыбегты Эллæ — саккаг ын кодта Кады гæххæтт йæ райгуы-
рæн бонмæ. Ахæм хæрзиуæг райста Цæгат Ирыстоны Парламенты номæй дæр йæ сæрдар Тъускаты Таймуразы къухæвæрдæй.
Хъыгагæн, Михал къорд азы размæ ахицæн йæ цардæй, фæлæ йæ кад æмæ намыс дарддæр хæццæ кæнынц Зойæимæ сæ цот æмæ уыдоны хъæбултæ. Сæ хæдзар — мыдыкъусау, уазæгæй цух никуы вæййы, æрбацæуæг кæддæриддæр рæвдыд æмæ зæрдæрухсæй аздæхы. Уымæн райста Зойæ йæ райгуырæн бон бирæ арфæйы ныхæстæ.
Зæрдиагдæрæй дын чи цы загъта, Зойæ, уыдон дыл æрцæуæнт дæ кæс-
тæртимæ. Мах дæр, дæ дард хæстæджыты, фæнды дæ хорздзинад: фылдæр дæ чи уарзы, уыдоны фæндиаг де ‘нусы сæрты уæнгрогæй акæс.
КЪУБАЛТЫ Аркади
