Ног ахуыры азы райдайæнæй фæстæмæ Цæгат Ирыстоны иумæйагахуырадон скъолаты сæ куыст кæнынц 26 аграрон къласы. Уый тыххæй фехъусын кодта Ахуырад æмæ наукæйы республикон министрады пресс-службæ.
Министрады минæвары ныхасмæ гæсгæ, агротехникæ æмæ хъæууон хæ-
дзарадимæ баст фарстатæм цымыдисдзинад чи æвдисы, уыцы скъоладзау-
тæн арæзт цæуынц алыхуызон практикон ахуыртæ. Уыимæ, уыцы семинартæн разамынд дæттынц æрмæст скъолаты ахуыргæнджытæ нæ, фæлæ Хæххон паддзахадон аграрон университеты наукон кусджытæ дæр.
Агропромышленнон лабораторитæм экскурситæ, бæлæстæ æмæ халсартæ садзыны куыст, хойраджы продуктты технологийы сусæгдзинæдтæ, зайæгойтæ æмæ æндæр кæрдæджыты хосгæнæн миниуджытæ иртасын – ацы æмæ æндæр ахæм мадзæлттæй пайдагонд цæуы аграрон къласы ахуырты рæстæг.
Æрхонкæйы фыццæгæм скъолайы ацы аз байгом кодтой ноджыдæр ма иу аграрон кълас. Афтæмæй баисты дыууæ. Уыцы æууæл хынцгæйæ, скъолайæн самал кæндзысты сæрмагонд ахуырадон ифтонггæрзтæ. Уыдоны фæрцы практикон ахуыртæ зынгæ фæхъомысджындæр уыдзысты. Зæгъæм, скъоладзаутæн амондзысты цыхт ахсыны, æхсынæны зети æмæ æндæр хойраг уадзыны технологитæ…
Министрады куыд фæбæрæг кодтой, афтæмæй аграрон кълæстæ байгом сты РЦИ-Аланийы разамынды уынаффæйæ. Ахæм ногдзинады сæйрагдæр нысантæ сты скъоладзауты рагагъоммæ профориентацийæн фадæттæ аразын, биологийæ, химийæ, физикæ æмæ иннæ предметтæй ахуырдзаутæн бæстондæр зонындзинæдтæ дæттын. Уыимæ, аграрон кълæстæ байгом кæнгæйæ, хыгъд цæуынц фыццаградон национ проект «Бæстæйы хойраджы æдасдзинадæн – технологон бындуртæ»-йы уагæвæрдтæ дæр.
КАЛМАНТЫ Аслан
