Мæздæджы районы Троицкæйы хъæуы сарæзтой, район æмæ сыхаг регионты минæвæрттæ кæм архайдтой, ахæм дзыллон фестиваль-армукъа «Кавказы адæмтæ».
Уыцы бон Культурæйы хъæууон хæдзармæ æрбамбырд сты районы цæрæн бынæттæй æрвыст фæсивæдон командæтæ æмæ национ-культурон иугæндты минæвæрттæ, стæй уазджытæ Дзæуджыхъæуæй, Грознайæ, Науыры станицæйæ….
Фысымтæ æмæ уазджыты раныхæсты фæстæ фæсивæдон командæтæ равдыстой сæ арæхстдзинад: акодтой адæмон кæфтытæ æмæ зарджытæ, радзырдтой районы цæрæг адæмты культурæ æмæ æгъдæутты тыххæй. Уыимæ, фестивалы уазджытæ аргъгæнæг уыдысты, фæсивæд æмæ сæ хъомылгæнджытæ цы хойраг сцæттæ кодтой, уымæн дæр. Алкæцы командæ дæр бацархайдта кавказаг адæмты иудзинад æмæ хæлардзинады хъомыс равдисыныл.
Бæрæгбоны кæронбæттæны фестивалы æппæт архайджытæ дæр акодтой иумæйаг «Хæлардзинады кафт».
Арæхстджындæр командæтæн саккаг кодтой Кады гæххæттытæ æмæ лæвæрттæ.
«Фестиваль чи бацæттæ кодта, уыцы адæмæн бузныг зæгъын! Зæрдæмæдзæугæ фембæлд рауад, æппæт къордтæ дæр сарæхстысты алы кавказаг адæмты удварнон хæзнаты тæваг сценæмæ рахæссынмæ, нæ бирæнацион бæстæйы цæрджыты иудзинад фидардæр кæнынмæ тырнындзинад равдисынмæ», – йæ хъуыдытæ раргом кодта мадзалы уазджытæй иу – æхсæнадон иугонд «Уæрæсейы культурæйы бархионтæ»-йы цæгатирыстойнаг хайады разамонæг Кочиты Георги.
Фестиваль-армукъайæн фадæттæ сарæзта Мæздæджы районы Фæсивæды социализацийы центр.
Нæ уацхæссæг
