Уыд Республикæ Цæгат Ирыстон-Аланийы Парламенты Советы æмбырд. Амыдта йæ Парламенты Сæрдар ТУСКЪАТЫ Таймураз.
Депутаттæ æркастысты æмæ равзæрстой респуб-ликæйы социалон-экономикон æмæ æхсæнадон-политикон цардимæ баст республикон закъонты проекттæ æмæ республикæйы Парламенты закъон-æвæрынадон хъæппæрис-тæ.
«Республикæ Цæгат Ирыстоны фæзуаты лæвар юридикон æххуыс кæныны тыххæй» Республикæ Цæгат Ирыстон-Аланийы закъонмæ ивддзинæдтæ бахæссыны тыххæй» закъоны проект æркæсынмæ рахаста Парламенты закъонæвæрынад, закъонад æмæ бынæттон хиуынаффæйады комитеты сæрдар Черчесты Аслан. Бæрæг куыд у, афтæмæй лæвар юридикон æххуыс кæмæ хауы, адæмы уыцы къордты номхыгъд рæстæгæй-рæстæгмæ кæны фылдæр. Ныр, документы куыд загъд ис, афтæмæй уыцы номхыгъдмæ хаст æрцæудзысты 18-23-аздзыд æрыгæттæ, сæ ныййарæг сæрмагонд æфсæддон операцийы кæмæн архайы, кæнæ æрыгон адæймагæн йæ ахуыры рæстæг, уыцы операцийы архайгæйæ, йæ ныййарæг кæмæн фæмард, уыцы сывæллæттæ.
Советы уæнгтæ бай-хъуыстой «2022-2025 азты Республикæ Цæгат
Ирыстон-Аланийы бæлццæттæ ласыны транспорты райрæзт»-ы тыххæй
Республикæ Цæгат Ирыс-тон-Аланийы паддзахадон программæйы мадзæлттæ æххæст кæнынæн 2023-2024 азты Транспорт æмæ фæндаггон инфраструктурæйы комитетæн
республикон бюджетæй цы фæрæзтæ лæвæрд æрцыд, уыдонæй закъонмæ гæсгæ куыд спайда кодтой, уый сбæрæг кæныны тыххæй» Республикæ Цæгат
Ирыстон-Аланийы Цæстдарæн-нымайæн палатæйы хъусынгæнинагмæ. Раныхасгæнæг уыд Палатæйы аудитор Айларты Алан. Куыд загъта, афтæмæй 2023 азæй программæйы мадзæлттæ æххæстгонд æрцыдысты 687,611 мин сомы аргъ, 2024 азы та – 311,749 мин сомы аргъ. Лизинг æмæ къазнайады æхцайы фæрцы уыцы
дыууæ азмæ фæзынд ног транспорт. Хардзгонд ыл æрцыд 807, 650 мин сомы, уыдонæй 300 милуан сомы уыдысты республикон бюджеты æхцатæ. Æдæппæтæй æлхæд æрцыд 166 ног автобусы, фæлæ дзы 33 афæдзы æмбисæй фылдæр лæууынц æнæ куыстæй, шофыртæ сын кæй нæй, уый аххосæй.
Фарстайы фæдыл æмдоклад скодта Парламенты промышленность, транспорт, бастдзинад æмæ амалхъомады комитеты сæрдар Киситы Мурат æмæ йæ раныхасы йе ‘ргом аздæхта æнæлыггонд фарстатæ æмæ сæ аиуварс кæныны гæнæнтæм.
Дыууæ доклады фæдыл Тускъаты Таймуразмæ, Парламенты Сæрдары хæдивæг Дойаты Светланæ æмæ Черчесты Асланмæ цы фарстытæ уыд, уыдонæн раныхасгæнджытæй уæлдай дзуапп лæвæрдта транспорты комитеты сæрдары хæдивæг Хъараты Зауырбег.
Депутаттæ ма байхъуыс-той РЦИ-Аланиийы Æнæниздзинад хъахъхъæнынады къабазмæ цæстдарды федералон службæйы фæзуатон оргæны архайды тыххæй хъусынгæнинагмæ. Амынд куыстуаты разамонæг Ольгæ Давыдова раныхас кодта ивгъуыд азы сæ куысты бæрæггæнæнтыл, сæйраг фæзилæнтæ æмæ фидæны нысантыл. Æмдоклад скодта Парламенты социалон политикæ, æнæниздзинад хъахъхъæнынад æмæ ветеранты хъуыддæгты фæдыл комитеты сæрдар Реуазты Ларисæ. Йæ раныхасы уый ранымадта, хъуыддаджы ма цы сагъæссаг фарстатæ ис, уыдон алыг кæныны гæнæнтæ, сæ иу – Парламенты амынд комитетæн, республикæйы Æнæниз-дзинад хъахъхъæнынады къабазмæ цæстдарды федералон службæйы фæз-уатон оргæнæн, РЦИ-Аланийы Æнæниздзинад хъахъхъæнынады минист-рад æмæ республикæйы медицинон кусæндæтты сæйраг дохтыртæн иумæ саразын уæрæхгонд æмбырд æмæ лæмбынæг равзарын алы сагъæссаг хъуыддаг дæр æмæ бакусын уавæр фæхуыздæр кæныны фæрæзтыл.
«Республикæ Цæгат Ирыстон-Аланийы фæсивæдон политикæйы тыххæй» Республикæ Цæгат Ирыстон-Аланийы закъонмæ ивддзинæдтæ бахæссыны тыххæй» закъоны проектыл ныхас кодта Парламенты национ политикæйы æмæ фæсивæды хъуыддæгты фæдыл комитеты сæрдар Хъесаты Ирыстон. Документы ныхас цæуы, студент уæвгæйæ (35 азы онг кæуыл цæуы, ахæмтæ), къайад чи скодта æмæ сывæллон кæмæн ис, ахæм æрыгон бинонтыл. Æрыгон бинонтæн нырмæ дæр уыд социалон æххуысы мадзæлттæ. Фæлæ, амынд бинонты къордмæ чи хауы, уыдонæн ныр æххуысы мадзæлттыл бафтдзæн.
Уымæй уæлдай, республикон закъонты проектты фæдыл ныхас кодтой Парламенты профилон комитетты сæрдартæ Качараты Олег, Остъаты Георги, Еленæ Князева, Киситы Мурат.
ДЕДЕГКАТЫ Зæлинæ
