Адæймаг йæ фидæны дæсныйад æнæ рæдыдæй цæмæй равзара, уый тыххæй дæсныйады «фæсчъылдым»-мæ бакæсын хъæуы.
Цæгат Ирыстоны паддзахадон университеты журналистикæйы факультеты декан Хæбæлаты Фатимæ Дзæуджыхъæуы 25-æм скъолайы ахуырдзаутæн сарæзта профориентацион фембæлд. Фатимæ скъоладзаутæн нырыккон журналистикæйы уавæры, стæй факультет кастфæуæвæг æмæ ныртæккæ журналистикæйы къабазы æнтыстджынæй кусæг адæймæгты тыххæй хабæрттæ радзырдта.
Фембæлды райдайæны скъолайы директор Дриаты Марат амынд æмбырды ахсджиагдзинад бафиппайдта. Хъомыладон куыстæй директоры уынаффæгæнæг
Кодзырты Ян фадæттæ кæмæн сарæзта, зæрдæхæлар уагæй ацæуæг ахæм дзыллон мадзалы фæрцы хистæркъласонтæ журналисты дæсныйад æмæ ахуырады фадæтты тыххæй бирæ ног хабæрттæ базыдтой. Фарстытæ разæнгардæй чи лæвæрдта, уыцы скъоладзаутæн фæстагмæ балæвар кодтой нæ республикæйы рацæуæг журналтæ æмæ чингуытæ, стæй, факультетмæ ахуыр кæнынмæ бацæуæн куыд ис, уый тыххæй хъусынгæнинæгтимæ брошюрæтæ.
Рæзгæ фæлтæр дæсныйады фæзилæнтæ цæмæй рахатой, ахуыргæнæндæтты æхсæн бастдзинадаразæг фембæлдтытæ уымæн ахъаз кæнынц.
Саутæты Тамилæ
