Ног куыстуат къалбасы цех байгом Дзæуджыхъæуы Карцамæ фæндагыл. Знон æй бабæрæг кодта РЦИ-Аланийы Хицауады Сæрдар ТУСКЪАТЫ Таймураз. Куыстуаты генералон директор БИТАРТЫ Алик Хицауады Сæрдарæн æмæ æппæт уазджытæн дæр равдыста ног цехы уавæртæ, радзырдта, куыд æмæ цæмæй кусдзысты, уыцы хабæрттæ. Битары-фырт куыд загъта, афтæмæй уадздзысты къалбасы алыхуызон продукци — 30 хуызы.
— Кусджыты нымæц у 50 адæймаджы. Ис сын куысты алы фадæттæ дæр, хæрæндон, тренажерты æмæ фæлладуадзæн залтæ. Куыстуаты арæзтадæн хардзгонд æрцыд 56 милуан сомы, уыдонæй 40 проценты сты, Цæгат Кавказы хъуыддæгты фæдыл министрад нын кæй радта, уыцы субсиди, — загъта Битарты Алик.
Цех ифтонг у нырыккондæр æмæ зынаргъдæр фæсарæйнаг техникæйæ. Хицауады Сæрдар федта, нæ республикæйы фæлхасгæнæгæн хæрзхъæд продукци уадзынæн цы æмбæлгæ, æнæмæнгхъæугæ домæнтæ ис, уыцы æппæт мадзæлттæ дæр.
— Ног куыстуат нын ныфс дæтты базарады фидæны нывылдзинадæн. Проект æххæстгонд цæуы УФ-йы паддзахадон программæ «Развитие Северо-Кавказского округа»-йы бындурыл. Алы субъектæн дæр ис йæхи дæлпрограммæ. Уыдонæй у Цæгат Ирыстон дæр. Ацы проект равзæрстам хъæппæрисджын къордимæ иумæ. Бакодтам базартыл иртасæн куыст æмæ, афтæмæй æрлæууыдыстæм ацы проектыл. Цы ифтонггæрзтæй кусдзысты специалисттæ, уыцы техникæйы фæрцы уагъд цæудзæн хæрзхъæд продукци, æппæт паддзахадон нормæтæ æмæ «госттæн» дзуапп чи дæтдзæн, ахæм, — загъта Тускъаты Таймураз. Ног куыстуаты сæйраг технолог Сергей Азаров та бæлвырд равдыста, дзидза куыстгонд куыд цæудзæн, къалбасы продукцийы онг, уый къæпхæнгай.
— Фыццагдæр уал нæ хæс у, бынæттон фæлхасгæнæджы бафсадын хæрзхъæд продукцийæ, уый фæстæ дарддæр хъуыды кæндзыстæм продукци иннæ регионтæм дæр æрвитыныл. Ацы къуыри нæ фыццаг продукци Ирыстоны цæрджытæ фендзысты нæхи сæрмагонд дуканитæ «Деликат»-ы æмæ супермаркетты. Нæхи дуканиты, кæй зæгъын æй хъæуы, продукци уыдзæн асламдæр, супермаркетты аргъæй. Суткæмæ цехы уагъд цæудзæн 5 тоннæйы къалбас, æмæ уал уый райдайæнты. Фæстæдæр нæ пълан фæфылдæр кæндзыстæм, — загъта сæйраг технолог.
Дзидзагуыстгæнæн куыстуæттæ нæ республикæйы ис, фæлæ фæлхасгæнæг арæх зæрдæрайæ нæ баззайы сæ продукцийы хæрзхъæддзинадæй. Нæ зæрдæ дарæм, знон цы ног цех байгом, уый продукци дуканиты тæрхæджытыл кæй нæ фæстиат кæндзæн, ууыл.
САУТÆТЫ Тамилæ Къамтæ систа КЪÆБЫСТЫ Харитон
