Ног чиныджы рацыд цин æрхæссы литературон æхсæнады минæвæрттæн æмæ чиныгкæсджытæн. Ноджы ма уыцы чиныг адæмы уарзон поэты сфæлдыстадыл фыст куы уа, уæд уыцы цин фæдывæр вæййы. Ахæм стыр æхсызгондзинад æрхаста нæ дзыллæйæн филологон наукæты кандидат, УФ-йы Фысджыты æмæ Журналистты цæдисты уæнг, журналист æмæ публицист ТЪЕХТЫ Тамерланы монографи «Художественный мир поэзии Александра Царукаева». Уый мыхуыры рацыд рауагъдадон хæдзар «Терские ведомости»-йы. Æрæджы, Дзæуджыхъæуы центрон библиотекæйы фыццæгæм филиалы арæзт æрцыд ног чиныджы презентации. Æрбамбырд æм сты поэттæ, фысджытæ, журналисттæ, библиотекæты кусджытæ æмæ чиныгкæсджытæ.
Презентацийы райдайæны райхъуыстысты фыссæг Агънаты Гæстæны ист киноныв «Нæ разагъды лæгтæ»-йæ æмдзæвгæйы рæнхъытæ. Фыццаг ныхасы бар лæвæрд æрцыд литературæиртасæг, филологон наукæты кандидат Хъантемыраты Риммæйæн. Уый бæлвырдæй радзырдта наукæмæ чиныджы авторы фыццаг къахдзæфты тыххæй. Куыд загъта, афтæмæй Тамерлан йæ куыстуарзондзинады æмæ ирон аив дзырдмæ уарзондзинады фæрцы цадæггай цæуы иу æнтыстæй иннæмæ. Йæ сыгъдæгзæрдæ архайд литературæзонынады ныртæккæйы æрыгон фæлтæрæн у дæнцæгæн хæссинаг æмæ бафæзминаг. Презентацийы монографийы ахадындзинад æмæ арæзтыл бæлвырд æрдзырдта ЦИПУ-йы ирон филологийы факультеты декан, филологон наукæты кандидат, Уæрæсейы Федерацийы культурæйы сгуыхт кусæг Хозиты Барис. — Æз Тамерланы ацы монографи бакастæн, нырма йæ хицæн чиныгæй дæр куы нæ ма рауагъта, уæд, — дзырдта Барис, — дисы мæ бафтыдта, уымæй æмæ æрыгон ахуыргонд Цæрукъаты Алыксандры поэзийы миниуджытæ куыд æппæтвæрсыгæй равдыста, йæ мидисамад ын куыд уырнинагæй федта, уый. Уымæй уæлдай ма Тамерлан йе ‘ргом аздæхта поэтæн йæ философон æмæ граждайнаг темæтыл фыст уацмыстæм. Æмæ уыдонмæ дæр æркаст ног хуызы æмæ сæ загъта йæхи хъуыды бæллиццаг æмæ уырнинагæй. Ацы ног чиныгæй автор йæ наукон разамонæг, профессор, дзæнæты бадинаг Джыккайты Шамилы ном кæй ары, уый дæр йæ рæсугъд æгъдауыл дзурæг у Шамилы стыр курдиаты раз. Презентацийы Цæрукъаты Алыксандры хрестоматион æмдзæвгæты æмæ сабитæн фыст уацмысты тыххæй йæ хъуыдытæ загъта Дзæуджыхъæуы æртыккæгæм астæуккаг скъолайы ирон æвзаг æмæ литературæйы ахуыргæнæг Æлборты Мераб. Цалдæр азы размæ Цæрукъаты Алыксандры цард æмæ сфæлдыстады тыххæй нæ телеуынынады ист æрцыд киноныв. Йæ автор — Цæгат Ирыстоны адæмон фыссæг, Хетæгкаты Къостайы номыл премийы лауреат Агънаты Гæстæн. Уый фембæлды архайджытæн куыд радзырдта, афтæмæй йæ кинонывы фæрцы равдисын бафæндыд Алыксандры удыхъæды уæздандзинад æмæ, йæ поэзи та фурдау уæрæх æмæ æнæкæрон кæй у, уый. Уый фæстæ æвдыст æрцыд кинонывæй иу цыбыр скъуыддзаг. Презентацимæ сæхи сæрмагонд аивадон хуын æрбахастой вокалон инструменталон ансамбль «Луар»-ы уæнгтæ Æлборты Ланæ æмæ Сергей. Уыдон гитарæимæ азарыдысты поэты æмдзæвгæйыл сæхи фыст зарæг «Рох симфони» æмæ ацагътой «Ханты цагъд». Уый фæстæ ныхасы бар лæвæрд æрцыд монографийы автор Тъехты Тамерланæн. Куыд загъта, афтæмæй йæ монографи уагъд æрцыд Уæрæсейы Федерацийы Культурæйы министрады гранты фæрцы. Фыццаг рауагъдимæ абаргæйæ ма йæ фæмидисджындæр кодта æмæ афтæмæй мыхуыры рацыд дыккаг хатт. Авторæн ма зæрдиаг бузныджы æмæ арфæйы ныхæстæ загътой Дзæуджыхъæуы центрон библиотекæйы бæстæзонæн хайады сæргълæууæг, Цæгат Ирыстоны культурæйы сгуыхт кусæг Мурасты-Дзугаты Риммæ, рауагъдадон хæдзар «Терские ведомости»-йы сæргълæууæг Таутиаты Хъазыбег, поэт, журналист, ПТРК «Алани»-ы редактор Къадзаты Станислав, газет «Рæстдзинад»-ы сæрмагонд уацхæссæг Баскаты Уырызмæг, уазджытæн æмæ фысымтæн мыггаджы номæй арфæ ракодта Цæрукъаты Азæ æмæ Дзæуджыхъæуы центрон библиотекæйы фыццæгæм филиалы сæргълæууæг Мысыкаты Разитæ. Презентацимæ библиотекæйы кусджытæ бацæттæ кодтой Цæрукъаты Алыксандры æмæ Тъехты Тамерланы фыст чингуыты равдыст дæр.
ГАСАНТЫ Валери
