Цæгат Ирыстоны культурæйы министры хæстæ рæстæгмæ æххæстгæнæг АТАЙТЫ Мæдинæ цы æмбырд сарæзта, уым ныхас цыд Ирон национ культурæйы рæзты концепцийы проектыл.
Концепцийы проект бацæттæ кодтой РЦИ-Аланийы Культурæйы министрады специалисттæ. Документы ныхас цæуы хæстæгдæр азты ирон национ культурæйы рæзты фæндæгтыл. Ныр проектыл æрныхас кодтой сæрмагонд кусæг къорды уæнгтæ: РЦИ-Аланийы Культурæйы министрады цур Æхсæнадон советы сæрдар, историон наукæты доктор, профессор Бзарты Руслан, историк Евгений Гонобоблев, Адæмон сфæлдыстад æмæ этнотуризмы республикон центр «Фарн»-ы директор Цæриаты Валери, Цæгат Ирыстоны Национ наукон библиотекæйы директоры хæдивæг Бибуаты Иринæ, Культурæйы министрады адæмон сфæлдыстад æмæ культурæйы бынты хайады хицау Дойаты Тамарæ. Æмбырды райдайæны Атайты Мæдинæ куыд фæнысан кодта, афтæмæй ацы документы бындур хъуамæ суой 2030 азмæ Культурæйы къабазы паддзахадон политикæйы стратегийы (фидаргонд æрцыд УФ-йы Хицауады уынаффæйæ 2016 азы 29 февралы) уагæвæрдтæ. Кусæг къорды уæнгтæ æркастысты концепцимæ, бахастой йæм бирæ фæндæттæ. Уыимæ, Ирон национ культурæйы рæзты концепцийы тыххæй сæ хъуыдытæ зæгъыны фадат ис æхсæнады минæвæрттæн дæр. Æппæт фæндæттæ æмæ фиппаинæгтæ дæр æрвитæн ис Культурæйы министрады электрон постмæ (minkult@globalalania.ru). Концепцийы проектыл дарддæр куыст цæудзæн.
Нæ уацхæссæг
