Республикæйы арæзтадон къабаз цы уавæры ис, æмæ федералон нысанмæарæзт программæты Цæгат Ирыстон куыд архайдзæн? Ацы æмæ иннæ фарстатыл РЦИ-Аланийы Сæргълæууæджы хæстæ рæстæгмæ æххæстгæнæг БИТАРТЫ Вячеслав æрныхас кодта Цæгат Ирыстоны Хицауады Сæрдары хæдивæджы хæстæ рæстæгмæ æххæстгæнæг ДЗАНАЙТЫ Барис æмæ республикæйы арæзтад æмæ архитектурæйы министры хæстæ рæстæгмæ æххæстгæнæг ИКЪАТЫ Русланимæ.
Министр куыд фехъусын кодта, афтæмæй 2016 азы фыццаг æмбисы фыццаградон национ проект «Аслам æмæ æппæтфадатджын цæрæнуæттæ»-йы уагæвæрдмæ гæсгæ нæ республикæйы арæзт æрцыд 84 мин квадратон метры цæрæнуæттæ. Республикæйы сæдæгай цæрджытæн фадат ис паддзахадон цæрæнуатон сертификатты фæрцы ног фатертæ райсынæн. Зæгъæм, ахæм федералон программæтæй иу — «Цæрæнуæттæ — уæрæсейаг бинонтæн»-ы ацы аз архайынц 90 бинонтæ. Дохтыртæ, ахуыргæнджытæ, паддзахадон службæгæнджытæ æмæ æндæр ахæм бюджетон категориты минæвæрттæ азы кæронмæ райсдзысты ног фатертæ. Ныхасы рæстæг сæрмагонд æргом аздæхтæуыд, сæ раздæры цæрæн бынæттæ æнæбары чи ныууагъта, уыцы адæмы уавæрмæ. Министры ныхасмæ гæсгæ, адæмы ацы категорийæн азы кæронмæ ратдзысты 240 цæрæнуатон сертификаты. Æмткæй райсгæйæ та рады лæууынц 2400 бинонтæ. Куыд нысангонд цæуы, афтæмæй уыдонæн цæрæнуæттæ хъуамæ раттой 2020 азмæ. Битарты Вячеслав министры æргом аздæхта, «эконом-къласы» цæрæнуæттæ фылдæр аразын кæй хъæуы, уымæ.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
