Знон Дзæуджыхъæуы фембæлд уыд Цæгат Ирыстоны Хетæгкаты Къостайы номыл паддзахадон университет æмæ Хуссар Ирыстоны паддзахадон университеты ректортæн. Фæстæдæр ОГЪУАТЫ Алан æмæ ТЕДЕТЫ Вадим журналисттæн куыд фехъусын кодтой, афтæмæй Цæгат æмæ Хуссар Ирыстоны паддзахадон университеттæ фенгомдæр кæндзысты се ‘мгуыстад ахуырадон, наукон æмæ культурон къабæзты
Тедеты Вадим зæрдиаг арфæ ракодта Огъуаты Аланæн, Цæгат Ирыстоны паддзахадон университеты ректоры хæстæ æххæстгæнæгæй йæ кæй снысан кодтой, уый фæдыл. «ЦИПУ-йы алкæддæр дæсны специалисттæ цæттæ кодтой Хуссар Ирыстонæн. Ныфс мæ ис, не ‘мгуыстад ноджы ахадгæдæр кæй уыдзæн, уымæй. Фæнд кæнæм иумæйаг наукон-практикон конференцитæ аразын, алы къабæзты кусæг специалистты дæсныдзинад бæрзонддæр кæнын, кæрæдзийы фæлтæрддзинадимæ зонгæ кæнын æмæ афтæ дарддæр», — йæ раныхасы фæбæрæг кодта Тедейы-фырт. Огъуаты Алан куыд загъта, афтæмæй йын уæлдай æхсызгондзинад дæтты, ног бынаты æрлæугæйæ йын фыццаг официалон фембæлд Цхинвалы университеты минæвæрттимæ кæй у, уыцы æууæл. «Хуссар Ирыстоны университетæн æххуыс кæндзыстæм амæй фæстæмæ дæр. Нæ хуссайраг æфсымæртимæ æмархайдмæ уыдзæн стырдæр цæстдард», — бафиппайдта Огъуайы-фырт. Тедеты Вадим сæрмагонд арфæйы ныхæстæ загъта ЦИПУ-йы президент Мæхæмæтты Ахуырбегæн, Хуссар Ирыстоны ахуыргæндтæн сæ диссертацион архайды алкæддæр кæй æххуыс кодта, уый тыххæй. «Хуссар Ирыстонæн наукон кадртæ цæттæ кæныны хъуыддагмæ стыр бавæрæн кæй бахастай, уый тыххæй дæ бузныг стæм! Махæй рох нæу, 2008 азы августы нæ университетæн цы лæггад бакодтат, уый дæр», — загъта Хуссар Ирыстоны паддзахадон университеты ректор. Фембæлды архайдта УФ-йы Президенты Аппараты уынаффæгæнæг Республикæ Хуссар Ирыстоны ахуырады рæзты фарстаты фæдыл Хъазахты Теминæ. Уый йæ раныхасы куыд фæбæрæг кодта, афтæмæй республикæйы уæлдæр ахуырад рæзы. «Абон Цхинвалы арæзт цæуы ног университетон комплекс. Уæрæсейы æххуысæй цы ахуырадон æмæ æндæр объекттæ арæзт цæуынц, уыдон ахъаз уыдзысты Хуссар Ирыстоны паддзахадон университеты наукон, ахуырадон æмæ культурон хъомыс фидардæр кæнынæн», — загъта Хъазахты Теминæ.
ЦÆРИКЪАТЫ Оксанæ
