Нефты компани «Лукойл-Югнефтепродукт»-ы артаджы станцæтæ дунейы 40 бæстæйы ис. Йæ хæрзхъæд продукцимæ гæсгæ лæууы æппæты бæрзонддæр æмвæзады дыккаг бынаты. «Лукойл»-æн æппæт регионты разамындтимæ ис æмгуыстады бадзырдтæ. Ахæм документ сарæзтой нæ республикæйы хицауадимæ дæр. Дыууæ азы размæ райдыдта Дзæуджыхъæуы «Лукойл»-ы артаджы фыццаг арæзтад æмæ знон байгом кодта йæ лæггæдты дуæрттæ, иудадзыг фæндагыл чи ис, машинæ скъæрыны бæрнондзинад йæ къухы кæмæн ис, уыцы бæлццæттæн.
Рæсугъд бæрæгбонмæ æрбацыдысты РЦИ-Аланийы Хицауады Сæрдары хæстæ рæстæгмæ æххæстгæнæг Тускъаты Таймураз æмæ Дзæуджыхъæуы администрацийы сæргълæууæг Æлбегаты Барис. Тускъаты Таймураз зæрдиаг арфæтæ ракодта, ног объекттыл чи бакуыста, æмæ Цæгат Ирыстоны дæр дунейы иннæ бæстæтимæ æмрæнхъ кады аккаг чи скодта, уыцы артаджыэнергетикон комплексы минæвæрттæн. Уый загъта: — Тынг æхсызгон мын у, артаджы зындгонддæр компанитæй иу нæ республикæйы дæр кæй æххæст кæндзæн йæ куыст. «Лукойл-Югнефтепродукт» канд артаджы куыст нæ кæны, фæлæ æххуыс кæны, цы бæстæты ис йæ архайд, уыцы регионты экономикон рæзтæн дæр. Артаджы комплексы лæггæдтæ уæрæх æмæ хæрзхъæд кæй сты, уый дызæрдыггаг никæцы шофырæн у. Йæ кой дæрдтыл хъуыстгонд у. Фæндагыл нывыл цæуынæн та артагæй чысыл аразгæ нæу. Нырыккон домæнтæн дзуапп чи дæтты, уыцы комплекс пайда уыдзæн нæ республикæйы социалон инновацитæ æмæ экономикон рæзтæн, — загъта Тускъаты Таймураз. «Лукойл-Югнефтепродукт»-ы генералон директор Алексей Филиппов бафиппайдта, нæ республикæйы разамындимæ бадзырд бафыссыны фæстæ Ирыстоны ахæм станцæтæ цалдæр саразын сæ зæрды кæй ис. — Артаг нæхи фыдæбоны продукт у. Æмæ кæмдæриддæр сты нæ станцæтæ, алы ран дæр сæ ис хæрзхъæд продукци. Цæгат Ирыстонмæ артаг цæудзæн нæхи Волгограды нефты куыстуатæй. Æппæт транспорты хуызтæн дæр уыдзæн сæрмагонд артаг. Уымæй уæлдай иннæ лæггæдтæ — хæрæндон хæрзад хойрагимæ æмæ фæлладуадзæн агъуыстытимæ, — загъта Алексей Филиппов. Ирон æгъдаумæ гæсгæ уазæгæн æгасцуай загътой æртæ уæливых æмæ бæгæныйы кæхцимæ. Бæрæгбон срæсугъд кодтой ирон кæфтытæй
САУТÆТЫ Тамилæ
Къамтæ систа КЪÆБЫСТЫ Харитон
