Ацы аз гом акционерон æхсæнад «Электроцинчы» 130 кусæгæй фылдæр Металлурджы бонмæ хорзæхджынгонд æрцыдысты паддзахадон, республикон æмæ куыстуаты хæрзиуджытæй. Уыдон сты мастертæ, бригадиртæ, пецтыл кусджытæ, электромонтертæ, механиктæ æмæ æндæр дæсныйæдты минæвæрттæ. Æппæтæйдæр сæ зæрдиаг фæллойæ фидардæр кæнынц паддзахады индустриалон хъомыс, стыр æвæрæн хæссынц регионы социалон-экономикон рæзтмæ
Уавæр афтæ у, æмæ ацы бæрæгбон иу кæны алы дæсныйæдты минæвæртты. Заводы гидрометаллургон цехы ифтонггæрзтæ цалцæг кæныны хистæр мастер Игорь Аргунов хорзæхджынгонд æрцыд РЦИ-Аланийы Промышленносты æмæ транспорты министрады Кады гæххæттæй. Цæгат Кавказы хæххон-металлургон институты электромеханикон факультеты фæндзæм курсы студент ма куы уыдис, уæд «Электроцинчы» кусын райдыдта цыппæрæм къæпхæны электромонтерæй, æмæ зыдта, заводæй кæй нал ацæудзæн, уый. Æцæгдæр, уæлдæр ахуыргæнæндон каст фæуыны фæстæ, æфсады рæнхъыты дыууæ азы баслужбæ кæнгæйæ, 2005 азы æрбаздæхт заводмæ. Уæдæй фæстæмæ йæ цæст дары цехы энергетикон ифтонггæрзты æнæкъуылымпы куыстмæ
Продукцийы хæрзхъæддзинад бæрæггæнæг управленийы лаборант Владленæ Сердюкова та райста гом акционерон æхсæнад «Электроцинчы» Кады гæххæтт. Ацы заводмæ 26 азы размæ куы ‘рбацыд, уæд æй фидарæй уырныдта, ам бирæ кæй нæ бафæстиат уыдзæн, уый.
— Продукци уæй кæныны хайады скълады хицауæй акусыны фæстæ мæ раивтой продукцийы хæрзхъæддзинад бæрæггæнæн управленийы центрон лабораторимæ æмæ ныронг ам кусын. Æргомæй куы зæгъон, уæд æндæр куысты бынат бацагурын мæ зæрдæйы кæрон дæр нæй. Сæйрагдæр у, мæ куысты кæй ницæмæй тыхсын, уый. Ам ис диссаджы, хæлар коллектив, — зæгъы Владленæ Сердюкова. Куыстуаты Арфæйы фыстæджы аккаг разынд сыгъдæггæнæн цехы аппаратыл кусæг — гидрометаллург Къутæрты Алан. Заводы уый фæллой кæны фондз азы. Раздæр тайынгæнæгæй куыста здыйы куыстады. Фæстæдæр уый урæд куы ‘рцыд, уæд кусын райдыдта цинчы куыстады сыгъдæггæнæн цехы фæрсудзæн-хусгæнæн хайады аппаратыл.
— Цыбыр æмгъуыдмæ иу куыстадæй рахызтæн æндæрмæ, кæд сæ технологимæ гæсгæ фæйнæхуызон сты, уæддæр, — бафиппайдта Къутæрты Алан. — Ацы хъуыддаджы мын феххуыс кодтой ме ‘мкусджытæ, æмæ сæ æз дæн стыр бузныг.
Республикæ Цæгат ИрыстонАлнийы Промышленност æмæ транспорты министрады Кады гæххæттæй хорзæхджынгонд æрцыд электрон цехы хистæр энергетик Дзанæгаты Зæлинæ.
— Цæгат Кавказы хæххон-металлургон институты ахуыркæнгæйæ, куыстадон практикæйы уыдтæн «Электроцинчы» æмæ сфæнд кодтон уæлдæр ахуыргæнæндон каст фæуыны фæстæ ам бакусын. 1989 азы мæ райстой заводы электроцехы рады мастерæй, фæстæдæр та мæ раивтой хистæр энергетикæй, æмæ ныр мæ бæрнондзинад бæлвырд фæфылдæр.
Майдан «Ирыстоны намысæн» ныр кадимæ хæсдзæн сыгъдæггæнæн цехы электрон ифтонггæрзтæ цалцæггæнæг электромонтер Базраты Руслан. «Уæрæсейы Федерацийы сгуыхт металлург» ссис заводы цыппор азæй фылдæр бакусæг, электронтайынгæнæн цехы хицауы хæдивæг Климæтты Адик, кадджын ном «РЦИ-Аланийы сгуыхт металлург» райста сондоны туагады цехы хайады хицау Юрий Прасолов.
Æппæт хæрзиуджытæ дæр бæрæггонд æрцыдысты æхцайы æмбæлгæ премитæй.
«Электроцинчы» пресс-службæ
