Хетæгкаты Къостайы райгуырды 159 азы кадæн Чукоткæйы хъæутæй иуы — Уэлены скъола-интернаты цыдис ирон литературæйы классикы æмдзæвгæтæ аивдæр бакæсыны конкурс. Уэленаг скъоладзаутæ Къостайы æмдзæвгæтæ кастысты ирон, чукоткæйаг æмæ уырыссаг æвзæгтыл.
Хетæгкаты Къостайы æмдзæвгæтæй сывæллæтты зæрдæмæ уæлдай тынгдæр чи цæуы, уый — «Гино» чукоткæйаг æвзагыл хуыйны «Мыльыттъын».
Конкурсы уæлахиздзаутæ систы Кирилл Кенкы, Еленæ Анаут, София Каляч, Ольгæ Савина æмæ Андрей Пилятагин.
Уэлены хъæуы скъолаинтернаты директоры хæдивæг Алексей Эйнес куыд загъта, афтæмæй скъоладзаутæ стыр æхсызгонæй фæархайынц патриотон клуб «Родина»- йы арæзт мадзæлтты æмæ бæллынц Ирыстонмæ æрцæуынмæ, уымæ гæсгæ ахуыр кæнын райдыдтой ирон адæмы истори æмæ культурæ, стæй ирон æвзагыл хицæн дзырдтæ æмæ хъуыдыйæдтæ.
Ацы мадзал саразыны хъæппæрис равдисæг патриотон клуб «Родина»- йы разамонæг Хъарданты Тимур куыд зæгъы, афтæмæй чукоткæйаг сабитæ амæй размæ архайдтой сывæллæтты нывты æппæтуæрæсеон конкурсы (цыдис Дигорайы). Республикæйы бонмæ та ирон тырысайы раз лæугæйæ ныффыстой æмæ сæрвыстой видеоарфæ Ирыстонæн.
Хетæгкаты Къостайы райгуырды 159 азы кадæн конкурсы призертæ систы канд Уæрæсейы Федерацийы æппæты скæсæйнагдæр хъæу Уэлены чукоткæйаг сабитæ нæ, фæлæ эскимосаг сывæллæттæ дæр, уыдон дæр ахуыр кæнынц бынæттон скъолаинтернаты, æмæ сын æрвыст æрцæудзæн æмбæлгæ хæрзиуджытæ. Ацы конкурс саразыны хъуыддаджы архайджытæ та райсдзысты Кады гæххæттытæ. Уыдон сты Алексей Эйнес, Геннадий Дрововозов, Татьянæ Пилятагина æмæ Валентинæ Сидорова.
ГУЦАТЫ А
