Хорз бæлас уымæй фæзæгъынц, æмæ йæ дыргътæ хæрзаддæр кæмæн вæййынц. Хорз фыссæг у, зæгъгæ, та уымæй фæзæгъынц, æмæ йæ фыст уацмыстæ адæмы зæрдæмæ фæндаг кæмæн ссарынц. Фыссæджы уыцы амондæй хайджын фæцис курдиатджын прозаик, публицист, УФ-йы Фысджыты æмæ Журналистты цæдисты уæнг, Уæрæсейы Федерацийы культурæйы сгуыхт кусæг, зынгæ æхсæнадон архайæг ДАУЫРАТЫ Дамир.
Ирыстоны адæмы уарзондæр фысджытæй иу, Дауыраты Дамирыл сæххæст 80 азы. Йæ юбилей йын кадджын уавæры сбæрæг кодтой нæ республикæйы Фысджыты цæдисы æмбырдтæ аразæн залы. Юбилярæн зæрдæбын арфæтæ ракодтой йе ‘мсис фысджытæ, йæ бирæ хæлæрттæ, зонгæтæ, культурæ æмæ аивады кусджытæ, æхсæнады минæвæрттæ, Фысджыты цæдисы аудæн советы уæнгтæ.
Кадджын изæр байгом кодта æмæ Дауыраты Дамиры цард æмæ йæ бирæвæрсыг сфæлдыстады тыххæй бæстонæй æмæ биноныгæй радзырдта РЦИ-Аланийы Сæргълæууæджы æмæ Хицауады администрацийы сæйраг консультант Бигъуылаты Людмилæ æмæ фыццаг ныхасы бар радта нæ республикæйы Фысджыты цæдисы правленийы сæрдар, адæмон фыссæг, Хетæгкаты Къостайы номыл паддзахадон премийы лауреат Агънаты Гæстæнæн.
— Курдиатджын прозаик, публицист æмæ зынгæ æхсæнадон кусæг, нæ ирон адæмы уарзондæр фысджытæй иу, Дауыраты Дамирыл абон æххæст кæны 80 азы, æмæ йын уый фæдыл не ‘ппæт дæр кæнæм зæрдиаг арфæтæ, — загъта йæ раныхасы Агънайыфырт, — нæ зæрдæ йын, фыццаджыдæр, зæгъы фидар æнæниздзинад æмæ ног сфæлдыстадон æнтыстдзинæдтæ. Дамир сфæлдыстадон куыст кæдæй кæны, уæдæй нырмæ цы бирæ уацмыстæ ныффыста æмæ чингуытæ рауагъта мыхуыры, уыдон йæ мингай чиныгкæсджыты зæрдæтæм хæссынц ирон нæртон æвзаджы рæсугъд азæлд æмæ тых. Куыд ирон куырыхон лæг, курдиатджын журналист, фыссæг, æхсæнады активон архайæг, афтæ алы хъуыддаджы дæр у фæзминаг.
Дауыраты Дамирæн сфæлдыстадон куысты ис йæхи æрмдзæф. Цы бирæ документалон уацмыстæ ныффыста æмæ фыссы абон дæр, уыдон ын адæм кæсынц стыр зæрдиагæй. Дамиры размæ дæр нæм иу æмæ дыууæ фыссæджы нæ уыд, кæцытæ фыстой документалон уацмыстæ. Уыдонимæ — Дзесты Куыдзæг, Дзадтиаты Тотырбег, Беджызаты Чермен, Мæхæмæтты Ахуырбег æмæ иннæтæ. Уыдоны фарн абон дарддæр кад æмæ радимæ хæссы Дамир дæр. Нæ бон фидарæй афтæ зæгъын у, æмæ Дауыраты Дамир документалон литературæ кæй систа бæрзонд æмвæзадмæ.
Уый фæстæ ма Дауыраты Дамиры цард æмæ бирæвæрсыг сфæлдыстады тыххæй сæ хъуыдытæ загътой æмæ юбилярæн зæрдылдарæн лæвæрттæ ракодтой нæ республикæйы культурæйы министры хæдивæг Дудайты Чермен, газет «Рæстдзинад»-ы сæйраг редактор Хозиты Барис, Чиныгуадзæн «Ир»-ы директор Таутиаты Хъазыбег, Фысджыты цæдисы аудæн советы сæрдар, историон наукæты доктор, профессор Цыбырты Людвиг, «Иры Стыр Ныхас»-ы сæрдар Кучиты Руслан, йæ хæдивæг Еналдыты Хъазыбег, Ирыстоны адæмон поэт Гуырдзыбегты Иринæ, фыссæг Будайты Милуся, УФ-йы сгуыхт æмæ нæ республикæйы адæмон нывгæнæг, Хетæгкаты Къостайы номыл паддзахадон премийы лауреат Дзбойты Михал, Ирыстоны адæмон фысджытæ Дзасохты Музафер æмæ Дауыраты Зоя, зындгонд журналист Хъуысаты Олег, Фысджыты цæдисы аудæн советы уæнг Мæрзойты Тамерлан, Ирыстоны адæмон поэт, Хетæгкаты Къостайы номыл паддзахадон премийы лауреат Кокайты Тотрадз, Дамир литературон фæндагыл æрлæууынмæ, фыццаджыдæр, кæмæн баххуыс кодта, уыцы курдиатджын поэттæй иу Касаты Батрадз æмæ прозаик Черчесты Хъасболат æмæ иннæтæ.
Кæронбæттæны кадджын изæры архайджытæн зæрдиаг арфæтæ ракодта Дауыраты Дамир.
ЕЛИСАТЫ Хъ.
