Цӕгат Ирыстон ӕмӕ Уӕрӕсейы ӕцӕг патриоттӕй иу — Фриаты Хазбечыры фырт Валери йӕ цардӕй ахицӕн 2024 азы 22 июлы. Фриайы-фырт уыд номдзыд ӕхсӕнадон архайӕг.
Райгуырд 1941 азы Заманхъулы, 1959 азы каст фӕцис Беслӕны 2-ӕм скъола. Ахуырмӕ бацыд Хӕстон авиацион училищӕмӕ, фӕлӕ йӕ кӕронмӕ нӕ фӕцис, уӕд Советон Цӕдисы Гӕрзифтонг тыхтӕ къаддӕр кӕнын бахъуыд. Кӕд Фриаты Валери ӕфсадӕй рацыд, уӕддӕр йӕ бӕллиц йӕ зӕрдӕйӕ не схицӕн, бацыд ӕмӕ иттӕг хорз бӕрӕггӕнӕнтимӕ каст фӕцис граждайнаг авиацийы Кирсановон училищӕ, уымӕй уӕлдай — Ленинграды граждайнаг авиацийы уӕлдӕр училищӕ.
Уым ӕй баурӕдтой кусынмӕ, 1976 азы Фриаты Валери каст фӕцис Граждайнаг авиацийы академи, бирӕ азты Бетъырбухы граждайнаг авиацийы ахуыргӕнӕндӕттӕ байгом кӕныныл архайдта. Специалисттӕ ӕмӕ разамынддӕтджытӕ цӕттӕ кодта. Уыдис Граждайнаг авиацийы академийы хицауы хӕдивӕг, йӕ ном ын бахастой «Уӕрӕсейы граждайнаг авиацийыл — 80 азы»-йы энциклопедимӕ.
Ногдӕр историйы уӕззаудӕр рӕстӕг — 1980 азтӕй 2000 азтӕм Фриаты Валери слӕууыд Бетъырбухы ирон диаспорӕйы сӕргъы, уыд ирон адӕмон съездтӕ ӕмӕ ӕппӕтирон адӕмон фыццаг конгрессы делегат. Йӕ ахстбынат уыд ӕргом: уӕрӕсейаг Фыдыбӕстӕйӕн лӕггад кӕнын, йӕ уарзон Ирыстоны сӕрыл дзурын. Граждайнаг сабырдзинад, ӕхсӕнадон институттӕ, культурӕты ‘хсӕн ныхас хъахъхъӕныны йӕ бавӕрӕн уыд стыр, йе ‘мдугонтӕ йын ӕмбӕлгӕ кад кодтой.
Бирӕ адӕмты хъысмӕтты Фриайы-фырт ныууагъта арф фӕд, Бетъырбухы ирон диаспорӕ сфидар кӕныныл бакодта стыр куыст. Национ культурӕ ӕвӕллайгӕйӕ парахат кодта, фӕлӕ йӕ архайдӕн арӕнтӕ нӕ уыд. Бетъырбухы Нациты хӕдзары йӕ архайдӕн аргъ кодтой, уым дӕр кӕддӕриддӕр уыд раззагдӕртимӕ. Йӕ разамындӕй нӕм фӕзынд ног раздзогтӕ, уыдон ирон диаспорӕйы рӕзтыл куыстой.
Ӕххуысхъуаг адӕймаджы нӕ ныууагътаид ӕнӕ цӕстдардӕй. Беслӕны террористон бӕллӕх йӕ зӕрдӕмӕ хӕстӕг райста, йе ‘ххуыссӕй фӕзынд амынӕты бахауӕг фӕсивӕды Бетъырбухы уӕлдӕр ахуыргӕнӕндӕттӕм бакӕныны программӕ. Уыдис ӕмхиц сфӕлдыстадмӕ, рауагъта поэтикон ӕмбырдгонд ӕмӕ прозӕйы чингуытӕ. Нывтӕ кодта ӕмӕ-иу сӕ равӕрдта равдыстыты.
Фриаты Валерийы фӕллойадон фӕндаг бӕрӕггонд ӕрцыд паддзахадон хӕрзиуджытӕ: «Хӕлардзинады орден», «Фыдыбӕстӕйы раз сгуыхтдзинӕдты тыххӕй II къӕпхӕны ордены майдан», «Ирыстоны Намысӕн»-ы майдан ӕмӕ ӕндӕртӕй. Йӕ цард лӕвӕрд ӕрцыд дзыллӕтӕн, йӕ ирон адӕмӕн лӕггад кӕнынӕн, йӕ цытджын бӕстӕйӕн. Йӕ уды рӕдаудзинад, хӕларзӕрдӕ узӕлд, чи йӕ зыдта, уыдонӕй бирӕ азты рох нӕ уыдзысты.
Ӕмбӕлтты къорд
