Нӕ бӕстӕйы алы къуымтӕй Цӕгат Ирыстонмӕ цӕуынц туристтӕ, сӕ бӕрц 70 проценты фылдӕр фӕцис. Афтӕмӕй уыдон балцыты рӕстӕг ацы аз, сӕрды, мобилон бастдзинад схардз кодтой 42 проценты фылдӕр.
Ахӕм хатдзӕгтӕ рахастой нӕ регионы уавӕрӕй «МегаФон»-ы специалисттӕ. Цӕгат Ирыстон у мидӕггаг туризмы сӕйрагдӕр рахӕцӕн. Уазджыты 15 проценты цӕуынц Мӕскуыйӕ, дыккаг рӕнхъы сты Цӕцӕнӕй — 11 проценты, ӕртыккаг рӕнхъы — Стъараполы крайӕ — 10,5 проценты.
Азӕй-азмӕ нӕм уазджытӕ ссӕуынц Чита, Йошкар-Ола, Мурманск, Иваново, Уфайӕ, сӕ фылдӕр сӕ фӕллад фӕуадзынц Дзӕуджыхъӕуы, бацӕуынц Беслӕнмӕ, республикӕйы хӕххон бынӕттӕм. Рӕсугъддӕр бынӕттӕ фенынмӕ ацӕуынц Цъӕйы Рекомы дзуармӕ, Куыртатты комы Курта ӕмӕ Тӕгайы мӕсыгмӕ. ӕппӕт зӕрдылдарӕн бынӕтты къамтӕ сисынц ӕмӕ сӕ равӕрынц социалон хызты.
«МегаФон»-ы директор Бесолты Ацӕмӕз куыд фӕбӕрӕг кодта, афтӕмӕй туристтӕн сӕ кар вӕййы 25 азӕй 44 азы онг. Сӕ зӕрдӕтӕ сын балхӕнынц рагон архитектурӕ, фендтаг бынӕттӕ, ӕвӕджиауы ӕрдз. Балцы рӕстӕг сын хорз ӕххуыс кӕнынц смартфон ӕмӕ мобилон интернет, базонынц историон цаутӕ, уазӕгдзӕрӕнты бынӕттӕ ныффидар кӕнынц, маршрут рацаразынц, ӕмӕ ма къамтӕ дӕр равӕрынц. Мобилон интернеты тагъдад райрӕзын кӕныныл компани ӕппынӕдзух кусы. Зӕгъӕм, Дзӕуджыхъӕуы, Беслӕны, Мӕздӕджы йӕ тагъдад схӕццӕ 150 Мбит/с-мӕ.
(«15-ӕм регион»)
