Цымæ цæуыл фæхъуыды кæны дохтыр, йæхи операцимæ куы фæцæттæ кæны, уæд? Цавæр æнкъарæнты ахæсты вæййы, куысты къæсæрæй куы бакъахдзæф кæны, уæд? Æви кæд, мыййаг, дохтыры йе ‘нкъарæнтæ хъыгдаргæ фæкæнынц?.. Чи у æцæг дохтыр, цавæр миниуджыты хицау у? Уыцы фарстытæн нын дзуапп ратта нæ хъайтар, йæхимæ гæсгæ хуымæтæг, махмæ гæсгæ та – фæлтæрдджын специалист Торчынты Эдуард.
Йæ фидæны дæсныйад медицинæимæ баст кæй уыдзæн, уый йæ сабибонтæй зыдта. Кæд чысыл лæппу уыдис, уæддæр хорз æмбæрста: адæмы рис фæсабыр кæнынæн стыр тых хъæуы. Уæвгæ, сæ мыггаджы бирæ хъуыстгонд дохтыртæ кæй ис, уый куы базыдта, уæд фæныфсджындæр æмæ скъолайы фæстæ бацыд Цæгат
Ирыстоны Паддзахадон медицинон институтмæ. Азтæ куыд атахтысты, уый Эдуард æмбаргæ дæр нæ бакодта, афтæмæй интернатурæ дæр æнтыстджынæй каст фæцис. Медицинæйы бирæвæрсыг цымыдисаг къабæзтæй равзæрста урологи. Уый æппынæдзух йæхиуыл куыста, йæ рæстæг дзæгъæлы нæ хардз кодта. Зонындзинæдтæ райсын ссис æрыгон лæппуйы царды сæйрагдæр нысан.
Эдуард кусын куы райдыдта урологæй, уæдæй нырмæ Беслæныхъæуы поликлиникæ æмæ рынчындоны бирæ адæмæн баххуыс кодта. Чидæриддæр æм бацæуы, уыдонмæ лæмбынæг байхъусы æмæ сын æмбæлгæ дзуапп ратты. Уæдæ йæм фæлладуадзæн бонты куы бадзурай, уæд дæр адæймагæн баххуыс кæндзæн. Беслæны-
хъæуы цæрджытæ куыд зæгъынц, уымæ гæсгæ йын йæ телефоны номыр зын ссарæн нæу.
Торчынты Эдуард стыр зæрдæйы хицау у. Рынчынтæ йæ хъулон уарзтæй уарзынц. Æууæндынц ыл канд йæ бирæ зонындзинæдты тыххæй нæ, фæлæ ма йæ зæрдæхæлар æмæ ауыдындзинады тыххæй дæр. Тетаты -Хъуысаты Джульеттæ дæр уæлдай бузныг у дохтырæй. Эдуарды тыххæй фехъуыста йæ зонгæтæй. Джульеттæйы ныхæстæм гæсгæ йын тынг баххуыс кодта Торчыны-фырт. Медицинон хоты хæстæм цы хауы, æппæт уыдæттæ йæхимæ райста, цæмæй сылгоймаг æппындæр ма стыхса. Дохтыр, фæзæгъынц, æрмæст йæ дзыхы ныхасæй дæр дзæбæх кæны адæймаджы. Ахæм хъуыдыйыл хæст сты Рахизфарсы районы цæрджытæ, Торчынты Эдуарды узæлд йæхиуыл чидæриддæр банкъардта, уыдон.
Дохтыры къæрцхъус уæвын хъæуы, уымæн æмæ алцыдæр йæ къухты арæхстдзинадæй аразгæ у, йæ хъуыдытæ та хъуамæ баст уой æрмæстдæр рынчынимæ. Эдуард хорз æмбары: операци кæмæн кæнынц, уымæ дуары
фæстæ æнхъæлмæ кæсынц йæ хæстæджытæ. «Дохтыры куыст у йæ фервæзын, баххуыс ын кæнын, хиуæттæн та ныфс раттын. Хъуамæ ферох кæна йæ хæдзары
хъуыддæгтæ, куысты къуылымпыдзинæдтæ, сагъæстæ. Адæймагæн уыцы иу рæстæг алцæмæ къæрцхъус уæвын зын вæййы, фæлæ хирургæн йæ зонд æндæрхуызон хъуамæ куса», – зæгъы Эдуард.
Торчыны-фырт операцитæгæнæн залæй куы рахизы, уæд ын чысыл фенцондæр вæййы, йæ зæрдæйы арфы цы тасдзинад вæййы, уый дæр æй суадзы. Эдуарды
хъуыдымæ гæсгæ, дохтыры куыст бирæ хъару домы. Йе сног кæнынæн алы дохтырмæ дæр йæхи сусæгдзинæдтæ ис.
Эдуард абон йæ хъысмæтæй разы у. Йæ ныхасмæ гæсгæ, кусы диссаджы æнгом,
куыстхъом коллективы, иу бинонтау кæрæ-дзи æмбарынц, сæ цин, сæ хъыг дæр иу сты. Дохтыр куыд зæгъы, уымæ гæсгæ арфæйы ныхæсты аккаг сты, йемæ чи кусы, уыдон.
КЪУТÆРТЫ Аидæ
