Таболты Сергей дзы сæрдариуæг кодта, афтæмæй уыд Дзæуджыхъæуы Минæвæртты æмбырды æстæм сесси. Депутатты раз 2024 азы куысты бæрæггæнæнты тыххæй доклад скодта горæты администрацийы сæргълæууæг Милдзыхты Вячеслав.
Милдзыхы-фырты ныхасмæ гæсгæ, администраци æмæ йæ структурон дæлхайæдтæ азы дæргъы сæ куыст æххæст кодтой рагагъоммæ фидаргонд пъланты бындурыл.
Дзуаппон рæстæг зынгæ куыст бачындæуыд нысанмæарæзт программæтæ æмæ проектты уагæвæрдтыл. Зæгъæм, бындурон цалцæг æмæ рацарæзты мадзæлттæ цыдысты 16 æхсæнадон фæлладуадзæн тæлмы (куыстытæн нысангонд уыд 77 милуан сомæй фылдæр). Уыимæ, уыцы аз зынгæ фæхъомысджындæр фæндæгты ифтонгад нырыккон светофортæ æмæ æндæр техникон цæстдарды фæрæзтæй. Уыцы азы дæргъы бындурон цалцæггонд æрцыдысты 23 бирæфатерон цæрæн хæдзары. Цалцæгæй уæлдай, архайд цыд бирæуæладзыгон хæдзæртты ног лифттæ æвæрыныл дæр. Азы дæргъы ахæм ифтонггæрзтæ ивд æрцыдысты 34 бирæфатерон цæрæн хæдзары. Бындурон цалцæджы программæйы бындурыл рацарæзтой 12 горæтаг скъолайы дæр.
Милдзыхы-фырт йæ раныхасы æрлæууыд æндæр хъуыддæгтыл дæр. Уыимæ, горæты разамонæг рагагъоммæ хатдзæгтæ скодта 2025 азы куысты бæрæггæнæнтæн дæр.
Æмбырды раныхас кодта администрацийы финансон управленийы хицау Цохъты Хъазыбег дæр. Уый дзуаппон доклад скодта, 2025 азы 9 мæймæ горæты бюджет куыд æххæстгонд æрцыд, уый тыххæй. Йæ ныхасмæ гæсгæ,дзуаппон рæстæгмæ муниципалон бюджеты æфтиæгтæ рауадысты 6 миллиарды æмæ 832 милуан сомы, хæрдзтæ та – 6 миллиарды æмæ 355 милуан сомы бæрц. Афтæмæй бюджеты профицит схæццæ 177 милуан соммæ. Управленийы хицау куыд фæбæрæг кодта, афтæмæй фыццаградон æргом здæхт цæуы бюджеты социалон статьятæ æмæ нысанмæарæзт проектты уагæвæрдтæ æххæст кæнынмæ.
Минæвæртты æмбырды депутаттæ æрдзырдтой горæты царды æндæр ахсджиаг фарстатыл дæр, уыимæ, се ‘ргом аздæхтой Ног азы бæрæгбæттæм цæттæ кæныны хъуыддагмæ дæр.
Нæ уацхæссæг
