Уæрæсе, Иран, Араббаг Эмираттæ, Казахстан, Узбекистан, Гуырдзыстон æмæ Хуссар Ирыстоны амалхъомты ’хсæн базарадон-экономикон баст-
дзинæдтæ райрæзынæн, Дзæуджыхъæуы йæ куыст ахицæн æлхæныны дунеон сесси «На высоте»-йæн. Мадзал арæзт æрцыд национ проект «Дунеон коопераци æмæ экспорт»-ы бындурыл.
Сессийы куысты архайдтой РЦИ-Аланийы Хицауады Сæрдар Дзанайты Барис, нæ республикæйы экономикон рæзты министр Сокаты Марат, Уæрæсейы экспортон
центры директор Наталья Минаева, программæ «Сделано в России»-йы директор Мария Архипова, регионалон бизнесы рæзты проекты разамонæг Станислав Одарич, РЦИ-Аланийы центр «Мой бизнес»-ы директор Дзокаты Маринæ.
Сесси цыдис æртæ боны. Йæ архайджытæ дзы равдыстой æртæсæдæйæ фылдæр хуызы продукци, фæсарæйнаг уазджытимæ сын уыдис 710 фембæлды. Таможняйы хъуыддæгтæ, продукцийы сертификаци, финансон операцитæ æмæ æндæр хуызы консультацитæ райстой. Уыимæ сын цымыдисаг балцытæ уыдис бынæттон куыстуæттæм, сæ архайдимæ зонгæ кодтой.
Сесси саразыныл бацархайдтой РЦИ-Аланийы Экономикон рæзты министрады дæлбар кусæг центр «Мой бизнес» æмæ акционерон æхсæнад «Российский экспортный центр».
Æлхæныны сесси у ахæм мадзал, амалхъомтæн фадат кæм вæййы стыр базарадон хызæгты минæвæрттæн кæнæ фæсарæйнаг æлхæнджытæн хиконд продукци равдисын æмæ хъуыддаджы бастдзинæдтæ скæнын. Ахæм сесситы фæстæ, гæнæн ис, æмæ сæ товартæ фæзыной дуканиты тæрхæджытыл, сæ æфтиæгтæ фæфылдæр уой, сæ дарддæры æмгуыстадыл æрныхас кæной.
Æлхæнджытæн дæр фæзыны ног гæнæнтæ.
ЦÆГÆРАТЫ Зæринæ
