Национ проект «Дæргъвæтин æмæ зæрдæзæгъгæ цард»-ы фæлгæты Цæгат Ирыстоны дарддæр архайд цæуы æнæниздзинад хъахъхъæнынады къабазы фыццаградон медицинон æххуысы къæпхæны объектты модернизаци-йыл.
Уый тыххæй «Рæстдзинад»- æн фехъусын кодтой Æнæниздзинад хъахъхъæнынады регионалон министрады пресс-службæйы.
Пресс-службæйы минæвары ныхасмæ гæсгæ, 2026 азы ног фелсырон-акушерон пункттæ фæзындзысты Уæллаг Ларс æмæ Эзмийы хъæуты. Павлодольскы, Троицк æмæ Терчы станицæты, Уæллаг Фыййагдон æмæ Дачнæйы хъæуты, стæй Спутничы поселочы та азы дæргъы сцалцæг кæндзысты бынæттон амбулаторитæ. Бындурон рацарæзт та баййафдзысты Хæзныдоны амбулатори, Заводы поселочы поликлиникæ æмæ Дзæуджыхъæуы 4-æм поликлиникæйы сылгоймæгты консультацион хайад.
Министрады куыд фæбæрæг кодтой, афтæмæй амынд национ проекты уагæвæрды бындурыл ахадгæ куыстытæ бакодтой 2025 азы дæр. Афтæ, бындурон цалцæггонд æрцыдысты Дзæуджыхъæуы сывæллæтты 1- æмæ 2-æм поликлиникæтæ, стæй горæты 4-æм поликлиникæйы фыццæгæм дæлхайад.
Национ проекты фæлгæты республикæйы нысангонд цæуы æндæр куыстытæ дæр.
Нæ уацхæссæг
