Уæрæсейы цæрджытæй ногазон каникулты рæстæг йæхицæн фæлладуадзæн-туристон балцытæ чи нæ бавгъау кодта, уыдонæн сæ фылдæр равзæрстой фыдыбæстæйаг курорттæ. Уыимæ, 2025 азы уыцы æмгъуыдимæ абаргæйæ, фæлладуадзæг адæмы нымæцыл бафтыд 12 проценты бæрц.
Ахæм бæрæггæнæнтæ фехъусын кодта уæрæсейаг туристон сервис «OneTwoTrip».
Сервисы хъусынгæнинагмæ гæсгæ, Уæрæсейы цæрджытæн сæ 67 проценты бæрц зымæгон каникулты фæлладуадзæн рæстæг арвыстой нæхи бæстæйы курорттæ æмæ æндæр туристон тæлмыты. Уыимæ, фылдæр адæмы суазæг кодтой Мæскуы (туристтæн сæ 20 проценты бæрц), Бетъырбух (14 проценты), Хъазан (4 проценты), Адлер (3,4 проценты) æмæ Краснодар (3 проценты).
Фæлладуадзæг адæм цалдæргай бонтæ зæрдæзæгъгæ уавæрты арвитынæн уæрæх спайда кодтой 4 æмæ 3 «стъалыджын» фысымуæтты, апартаментты, хостелтæ æмæ хицæн фатерты фадæттæй.
Уыимæ, ацы хатт зынгæ фæфылдæр, ногазон каникулты фæсарæнтæм чи абалц кодта, уыцы туристты нымæц (фароны уыцы æмгъуыдимæ абаргæйæ, 30 проценты фылдæр). Уыимæ, фæстаг азты куыд уыд, афтæ ныр дæр уæрæсейаг туристтæн сæ фылдæр равзæрстой Турк (12 проценты бæрц), Таиланд (9 проценты) æмæ Иугонд Араббаг Эмираттæ (7 проценты бæрц). Фæлладуадзæг адæм æхсызгонæй абалц кодтой Белорусси æмæ Китаймæ дæр.
Эксперттæ куыд зæгъынц, афтæмæй фыццаградон национ проект «Туризм æмæ уазæгуарзондзинад» æмæ иннæ федералон программæты фæрцы къабазы уавæр хуыздæрæрдæм ивы, хъомысджындæр кæны бæстæйы регионты курортон-фæлладуадзæн инфраструктурæ. Æмæ уыцы фадæттæй уæрæсейæгтæ арæхæй-арæхдæр спайда кæнынц…
КАЛМАНТЫ Аслан
