2025 азы ныййарæджы капиталы фæрæзты фæрцы цæгатирыстойнаг 2500 бинонтæй фылдæр фæхуыздæр кодтой сæ царды уавæртæ. Уыцы нысанæн Уæрæсейы Социалон фонды регионалон хайад радих кодта 1,4 миллиард сомæй фылдæр.
Фонды пресс-службæйы минæвары ныхасмæ гæсгæ, ныййарæджы капиталы тыххæй сертификатты хицæуттæн сæ фылдæр амынд паддзахадон æх-хуысы фæрæзтæ схардз кæнынц сæ царды уавæртæ фæхуыздæр кæныныл. Бæрæг куыд у, афтæмæй сертификаты фæрæзты фæрцы ис хæдзар рацаразæн, кæнæ та сæм, уæлæмхасæн кредитон фæрæзтæ бафтаугæйæ, ног цæрæнуат балхæнæн. Ахæм хъуыддаг саразæн ис капиталы фæрæзтæй ипотекон фиддоны иу хай бафидæн дæр.
Уагæвæрды куыд загъд ис, афтæмæй сертификаты фæрæзтæ бинонты царды уавæртæ хуыздæрæрдæм фæивыныл схардз кæнæн ис, сывæллоныл æртæ азы куы сæххæст уа, уæд. Уыимæ, ацы фæткæн фехалæн ис, бинонты ипотекон фиддон кæнын куы хъæуа, кæнæ та сын цæрæнуатон кредит фидинаг куы уа, уæд. Ахæм фиддон сæхгæнынæн сертификаты фæрæзтæй спайда кæнæн ис сывæллоны райгуырды фæстæ.
«Уыимæ, зæрдыл дарын хъæуы, капиталы фæрæзтæ царды уавæртæ фæхуыздæр кæныныл схардз кæнæн кæй ис æрмæстдæр сæрмагонд къамисы уынаффæйы бындурыл. Ахæм къамисы уæнгтæ æлхæнынмæ æвзæрст фатер кæнæ хæдзар фенынц æмæ скæнынц æмбæлгæ хатдзæгтæ цæрæнуаты æнаипдзинады тыххæй», – бафиппайдта Уæрæсейы Социалон фонды цæгатирыстойнаг хайады сæрдар Милдзыхты Аслан.
Ахæм къамисы уынаффæ райсыны тыххæй курдиат бадæттын хъæуы бынæттон администрацимæ. Къамис йæ хатдзæг куы скæна, уæд уыцы гæххæтт бадæттын æмбæлы Социалон фонды территорион хайадмæ. Уый фæстæ фонды специалисттæ уынаффæ рахæссынц ныййарæджы капиталы тыххæй сертификаты фæрæзтæ æвзæрст нысаныл схардз кæныны фæдыл.
Ныййарæджы капиталы тыххæй программæйы уагæвæрдты фæдыл æппæт фарстытæ дæр бадæттæн ис Социалон фонды контакт-центрмæ ахæм телефонæй: 8-800-100-00-01 (хæтæл кусы къуырисæрæй майрæмбонмæ 9 сахатæй 18 сахаты онг).
Дмитрий Астахов
