Хæцгæ низты рапарахаты рæстæг РЦИ-Аланийы «Роспотребнадзор»-ы управлени фæкарздæр кодта профилактикон æркастытæ рæвдауæндæтты.
Ахæм рæстæг Управленийы специалисттæ пъланмæ гæсгæ профилактикон мадзæлттæ аразынц скъолайы агъоммæйы ахуырадон кусæндæтты. Æркастыты сæйраг нысан у, санитарон æгъдауимæ баст закъонæвæрынад куыд æххæстгонд цæуы, уый сбæрæг кæнын æмæ сывæллæтты, стæй рæвдауæндоны кусджыты æнæниздзинад бахъахъхъæнын.
Скъолайы агъоммæйы ахуырадон кусæндæтты æнæмæнг æххæстгæнинаг сты хæцгæ низты профилактикæйы уæлæмхасæн мадзæлттæ: алы райсом дæр рæвдауæндæтты хъуамæ пайда кæной антисептиктæй, алы уатмæ дæр рæстæгæй-рæстæгмæ хъуамæ уадзой сыгъдæг уæлдæф, кусджытæй се ‘ппæтмæ дæр хъуамæ уа хи хъахъхъæнæн медицинон фæрæзтæ.
– Нæ хæс у канд халæн цаутæ раргом кæнын нæ, фæлæ, фыццаджыдæр, кусæндон сæ цæмæй ма ‘руадза, уымæй сын баххуыс кæнын. Эпидемиологон карз уавæры уый у уæлдай ахсджиагдæр, уымæн æмæ санитарон домæнтæ æххæст кæнынимæ комкоммæ баст у сывæллæтты æнæниздзинад. Уазал рæстæг карз вирусон хæцгæ низты профилактикæйыл ныхас нæ цæуы, фæлæ тъæнгтæ æмæ гуыбыннизты инфекциты профилактикæйыл дæр. Уымæ гæсгæ каст цæуы сывæллæттæн сæ фынджы æгъдау æмæ сæ хæринагмæ дæр, хойраджы хæрзхъæддзинадмæ, цы уавæрты йæ дарынц, уымæ, стæй хæринаг цæттæ кæныны технологитæм. Уыимæ, бæрæггонд æрцæуынц æппæт документтæ дæр, – загъта управленийы эпидемиологон цæстдарды хайады сæргълæууæг Цæрикъаты Мæдинæ.
Хицæн æгъдаумæ гæсгæ каст цæуы рæвдауæндæтты кусджыты æнæниздзинадмæ. Специалисттæ сбæрæг кæнынц, санитарон гæххæтт алы кусæгмæ дæр ис æви нæ, æнæмæнг æххæстгæнинаг медицинон æркаст афоныл ацæуынц æви нæ, профилактикон вакцинаци сарæзтой æви нæ, уый, стæй, гигиенон æгъдауæй куыд цæттæ сты, æппæт уыцы хъуыддæгтæ.
Дедегкаты Зæлинæ
