Хардзгонд электрон тыхæн фидынæй стыр хæстæ чи скодта æмæ сæ сæхгæныныл чи нæ архайы, уыцы куыстуæттæ æмæ иннæ юридикон иуæгтæй компани «Севкавказэнерго» дзуапп æрдомдта тæрхондоны фæрцы.
Уый тыххæй фехъусын кодта электрон тых дæттæг куыстуаты пресс-службæ.
Компанийы минæвары ныхасмæ гæсгæ, 2025 азы хæсдарджыты ныхмæ тæрхондонмæ балæвæрдтой 1,2 мин курдиатæй фылдæр. Уыдоны фæдыл тæрхондæттæ абоны онг рахастой 1 минæй фылдæр æмбæлгæ уынаффæтæ æмæ æрдомдтой хæсдарджытæй хардзгонд электрон тыхæн æвæстиатæй бафидын. Ахæм уынаффæты фæрцы уал абоны онг компанийы хыгъдмæ хæсдарджытæй æрбафтыд 829 милуан сомы бæрц. Иннæ хæсдарджыты хъуыддæгтæм дæр тæрхондон æркæсдзæн.
Дзуаппон рæстæгмæ куыстуат тæрхондæттæм цы курдиæттæ балæвæрдта, уыдонæн сæ иумæйаг аргъ уыд 1,4 миллиард сомæй фылдæр. Уыимæ, уыцы хæстæй 1 миллиард сомы бæрц скодтой республикæйы цæрæнуатон-коммуналон хæдзарады куыстуæттæ.
«Акционерон æхсæнад «Россети Северный Кавказ» æппæт фæлхасгæнджыты зæрдыл дæр лæууын кæны: хардзгонд электрон тыхæн фиддонтæ цас афойнадыл конд цæуой, уымæй бирæ аразгæ у регионы энергетикон комплексы нывыл куыст, уый фæрцы æххæстгонд цæуынц инфраструктурон объектты цалцæг æмæ модернизацийы мадзæлттæ», – загъд ис компани «Севкавказэнерго»-йы пресс-службæйы хъусынгæнинаджы.
Дмитрий АСТАХОВ
