Цæгат Ирыстоны ацы аз дæр æххæстгонд цæуынц нысанмæ арæзт программæтæ «Хъæууон дохтыр» æмæ «Хъæууон фелсыр». Уый тыххæй хъусын кæны РЦИ-Аланийы Æнæниздзинад хъахъхъæнынады министрады пресс-службæ.
Зындгонд куыд у, афтæмæй амынд программæты уагæвæрдтыл Цæгат Ирыс-
тон кусы фæстаг цалдæр азы дæргъы. Программæты сæйрагдæр нысан у хъæууон медицинон кусæндæттæ хъæугæ специалисттæй ифтонг кæнын.
Афтæмæй программæйы архайæг суæвын æмæ йæ кусæн бынат хъæумæ раивыны фæндон чи равдиса, уыцы дохтыртæн иухаттон паддзахадон æххуысы хуызы лæвæрд æрцæуы фæйнæ 1 милуан сомы, астæуккаг къæпхæны специалисттæн та – фæйнæ 500 мин сомы. Кæй зæгъын æй хъæуы, ахæм ахадгæ æххуыс разæнгарддæр кæндзæн æрыгон специалистты, цæмæй сæ кусæн бынæттæн æвзарой хъæууон медицинон пункттæ.
Æнæниздзинад хъахъхъæнынады министрады минæвары ныхасмæ гæсгæ, ацы аз программæты архайыны фадат ис 24 дохтыр æмæ 2 фелсырæн. «Медицинæйы къабазы зынаргъ специалисттæ! Кæд уæ искæмæ цымыдисдзинад сæвзæрд æмæ йæ фæнды йæ хъарутæ ног хъуыддаджы бавзарын, уæд æй курдиат бадæттын хъæуы сæрмагонд къамисмæ», – бафиппайдта министрады минæвар.
Зæгъын хъæуы, амынд программæты архайæг цалдæр азмæ 300 цæгатирыстойнаг дохтыр æмæ фелсыры кæй систы, уый дæр. Уыдоны архайды фæрцы зынгæ фæхъомысджындæр хъæууон медицинон кусæндæтты уавæр. Ныр бирæ хъæуты цæрджыты медицинон æххуыс агурæг дард цæуын нал бахъæуы, уымæн æмæ дæсны специалисттæ кусынц сæхи амбулатори кæнæ фелсырон-акушерон пункты дæр.
Дмитрий Астахов
