Цæгат Ирыстоны районты хъалонты фæдыл хæсы бæрц фæкъаддæр кæныны фарстатыл ныхас кæм цыд, республикæйы Хицауады Сæрдар Дзанайты Барис ахæм æмбырд сарæзта.
Фембæлды архайджытæ: æххæстгæнæг хицаудзинады оргæнты, Хъалонты федералон службæйы æмæ Тæрхонадон пъырыстыфты федералон службæйы регионалон управлениты, Фидауынгæнæг тæрхонгæнджыты аппараты разамонджытæ, стæй муниципалон иугæндты сæргълæуджытæ – биноныг æрныхас кодтой хъалонты (уыимæ – зæххы хæйтты тыххæй хаццоны фиддоны) фæдыл хæсы бæрц фæкъаддæр кæныны фарстатыл.
Ныхас кæнгæйæ, Хъалонты федералон службæйы цæгатирыстойнаг управленийы разамонæджы хæдивæг Кæсæбиты Сергей загъта:
– Фарон республикæйы иумæйаг бюджетмæ бафтыдысты 39 миллиард сомæй фылдæр хъалонтæ æмæ фиддонтæ, ома, æндæразимæ абаргæйæ, нудæс проценты фылдæр. Афæдзы бæрæггæнæнтæм гæсгæ, иумæйаг хъалонты фæдыл æппæт фидаргонд бардзырдтæ æххæстгонд æрцыдысты, фæлæ нывыл бæрæггæнæнтæ нæ нымайгæйæ, цæстдарддомæг лыггæнинаг фарстатæ ис.
Хъалонты инспекцитæ æмæ бынæттон муниципалитеттæ ахадгæ æмгуыст цæмæй кæной, уый тыххæй Дзанайы-фырт бахæс кодта ацы хъуыддаджы фæдыл алы районы дæр рæхджы бæрнон адæймæгты сфидар кæнын.
Уымæй уæлдай, Хицауады Сæрдар районты администрацитæн бафæдзæхста фæкъуыллуппуæвæг кусæндæттæ афоныл рабæрæг кæнын æмæ ацы кусæндæтты тыххæй хабæрттæ хъусын кæнын.
Уыимæ, муниципалон иугæндты хæс у транспорты æмæ зæххы хъалонтæ æмбырд кæныны фæдыл куыст фæрæвдз кæнын.
– Ацы азы бюджет бацæттæ кодтам, пъланмæ гæсгæ кусæм. Фæлæ республикон бюджетæй уæлæмхасæн фæрæзтæ рахай кæныны фæдыл курдиæттæ кæд æрбафтой, уæд уынаффæтæ хъалонты фæдыл хæсы бæрцмæ гæсгæ кæй рахæсдзыстæм, районты администрацитæй уый рох ма уæд. Хи æфтиæгтыл бакусут. Республикæйы Сæргълæууæг Сергей Меняйло ацы хъуыддаджы ахадын-
дзинады тыххæй хабар цалдæр хатты адæмы зæрдыл æрлæууын кодта. Хъалонты фæдыл хæсы бæрц цæмæй фæкъаддæр уа, уый тыххæй цæст лæмбынæг дарын æмæ мадзæлттæ афоныл аразын хъæуы, – загъта Хицауады Сæрдар.
Премьер-министр профилон структурæтæн бахæс кодта муниципалитеттæн амынд хъуыддаджы æххуыс кæнын. Хъалонты фиддонты бæрц цæмæй фæфылдæр уа, уый тыххæй Экономикон рæзты министрады хæс у юридикон иуæгтæ æмæ индивидуалон амалиуæггæнджытимæ кусæг къордты æмгуыстад фæпарахат кæнын.
РЦИ-Аланийы
Сæргълæууæг
æмæ Хицауады
пресс-службæ
