2026 азы райдайæнæй нырмæ Цæгат Кавказы федералон зылды регионты фæсивæд балæвæрдтой 255 мин курдиатæй фылдæр «Пушкины картæ»
райсыны тыххæй.
Ахæм нымæцтæ фехъусын кодта амынд федералон программæйы оператор – банк «ВТБ»-йы пресс-службæ.
Банчы пресс-службæйы бæрæггæнæнтæм гæсгæ, азы райдайæнæй нырмæ Цæгат Кавказы регионты цæрæг фæсивæд «Пушкины картæ»-йы фæрцы лæвар бабæрæг кодтой дæсгай концерттæ, спектаклтæ, культурæйы æндæр мадзæлттæ 70 милуан сомæй фылдæры аргъæй (уыимæ, «Пушкины картæ»-йы фæдыл федералон программæйы уагæвæрды бындурыл 2026 азæн федералон зылды цæрджытæн нысангонд цæуы 1,2 миллиард сомы бæрц). Операторы минæвары ныхасмæ гæсгæ, фæсивæд «Пушкины картæ»-йæ арæхдæр спайда кæнынц, кинотеатртæм цæугæйæ (æппæт хæрдзтæн се ’мбисы бæрц).
«Æхсызгон нын у, Цæгат Кавказы федералон зылды регионты фæсивæд фылдæр æргом кæй аздæхта «Пушкины картæ»-йы фæдыл федералон программæйы фадæттæм – скъоладзаутæ æмæ студенттæ арæхдæр бабæрæг кæнынц театртæ, музейтæ, кинотеатртæ æмæ æндæр алыхуызон равдыстытæ. Рæстæг куыд æвдисы, афтæмæй бонæй-бонмæ фылдæр æрыгæттæ фæллад уадзынæн равзарынц культурæйы кусæндæтты цымыдисагдæр æмæ дзыллон мадзæлттæ», – фæбæрæг кодта банк «ВТБ»-йы вице-президент Александр Дыренко.
«Пушкины картæ»-йы фæдыл федералон культурон-рухстауæн прог-
раммæйы операторы хæстæ «ВТБ»-йы бæрны бакодтой 2026 азы райдайæны. Программæйы архайæг суæвыны тыххæй фæсивæдæн курдиæттæ бадæттæн ис электронон хуызы Паддзахадон лæггæдты порталы, кæнæ «ВТБ»-онлайны фæрцы. Уымæй уæлдай, ацы фарстайы тыххæй бацæуæн ис банчы офистæм дæр. Программæйы уагæвæрды куыд загъд ис, афтæмæй иу картæйы хыгъдмæ афæдзы дæргъы æрвыст æрцæуы 5 мин сомы бæрц (уыдонæй 2 мин сомы схардз кæнæн ис кинонывтæм бакæсынæн, иннæ æхца та – культурæйы æндæр мадзæлттæ бабæрæг кæнгæйæ).
Цæгат Ирыстоны фæсивæд дæр амынд программæйы фадæттæм къæрцхъус сты. Афтæ, республикæйы Культурæйы министрады бæрæггæнæнтæм гæсгæ, «Пушкины картæ»-йæ регионы пайда кæнынц 58 мин æрыгон адæймагæй фылдæр…
Калманты Аслан
