19 апрелы сбæрæг кодтам 1941-1945 азты Фыдыбæстæйы Стыр хæсты заман советон адæмы геноциды амæттæгты номарæн бон.
Ацы боны кадæн Цæгат Ирыстоны Национ политикæ æмæ æддагон бастдзинæдты министрад, Адæмты хæлардзинады республикон хæдзар æмæ Дзæуджыхъæуы Æхсæнадон совет сарæзтой номарæн рухсадон-патриотон акци.
Акцийы архайджытæ базонгæ сты амынд боны фæзындыл дзурæг æууæлтимæ, стæй байхъуыстой Советон Цæдисы регионты æххæстгонд адæмты геноциды тыххæй ахсджиаг хабæрттæм.
Æмбырды архайджыты раз раныхас кодтой нæ республикæйы паддзахадон хицаудзинады оргæнты минæвæрттæ, ахуыргæндтæ, национ-культурон æхсæнадты уæнгтæ, регионалон хæстыты æмæ сæрмагонд æфсæддон операцийы архайджытæ, концентрацион лагерты фæбадæг ахст адæймæгтæ, хæсты сывæллæттæ, стæй Дзæуджыхъæуы ахуыргæнæндæтты студенттæ. Рагондзинады æмгъуыд кæмæн нæй, ахæм æвирхъау цаутыл дзурæг видео-æрмæджытæ æмæ къамтæ æвдыст æрцыдысты.
Арæзт акцийы хæстæ:
– нацистты арæзт фыдракæндты
егъаудзинады тыххæй æнæхин хабæрттимæ фæсивæды базонгæ кæнын;
– фæсивæд историон номарæнæн аргъ цæмæй кæной, ууыл архайын.
– патриотизмы хъомыладæн, граждайнаг бæрнондзинадæн, стæй, Фыдыбæстæйы Стыр хæсты заман советон адæм кæй равдыстой, уыцы сгуыхтдзинæдтæн дзыллæтæ аргъ цæмæй кæной, уымæн ахъаз кæнын;
– 19 апрелы – 1941-1945 азты Фыдыбæстæйы Стыр хæсты заман советон адæмы геноциды амæттæгты номарæн бон – паддзахадон хицаудзинады, æппæт бынæттон хиуынаффæйады оргæнты, ахуырадон, наукон æмæ культурон кусæндæтты архайдмæ цæст дарын;
– мæнг историон хабæртты æмæ нацизмы реабилитацийы ныхмæ архайын.
Акцийы раныхасгæнджытæ – амынд министрады разамонæджы фыццаг хæдивæг Петр Павлов, нæ республикæйы Ветеранты советы кадджын сæрдар, отставкæйы инæлар-майор Къаболаты Солтан, Хуссайраг æфсæддон зылды иугонд стратегион командæкæнынады инспектор, инæлар-майор Елхъанаты Владимир, Цæгат Ирыстоны Сæргълæууæджы паддзахадон уынаффæгæнæг Тебиаты Еленæ, Уæрæсейы Фæсарæйнаг хъуыддæгты министрады минæвар Дзæуджыхъæуы Мамиаты Багир, Фыдыбæстæйы Стыр хæсты архайæг, концлагер «Освенцим»-ы фæбадæг Карсанаты Владимир, Дзæуджыхъæуы Æхсæнадон советы патриотон хъомылады къамисы сæрдар, булкъон Гецаты Валери, национ-культурон æхсæнадты сæрдартæ Анатолий Харин, Аракси Сафрониди, Александр Апостолиди, Лев Стоцкий, Валерий Устинов æмæ æндæртæ – куыд загътой, афтæмæй, Фыдыбæстæйы Стыр хæсты заман нацисттæ æмæ сæ хъузæттæ оккупацигонд территоритыл советон адæмы ныхмæ кæй сарæзтой, уыцы фыдракæндтæ рох кæнын не ’мбæлы, стæй, адæм нацизмы зондахастыл разы цæмæй ма уой, уымæн ахъаз кæнын хъæуы.
Уæрæсейы Президент Владимир Путин æмæ бæстæйы разамынд 19 апрелы геноциды амæттæгты номарæн бон кæй расидтысты, уымæн ис стыр ахадындзинад.
Акцийы кæрон Дзæуджыхъæуккаг æмæ Алайнаг епархийы динамонæг, протоиерей Фыд Евгений (Попович) æмбырды архайджытæн бафæдзæхста геноциды темæмæ æргом аздахын. Адæмты хæлардзинады республикон хæдзары директор Александр Охотников та акцийы архайджытæн бузныг загъта.
Нацизм ногæй кæй нал фæзындзæн, акцитæ уымæн кæй ахъаз кæнынц, ууыл зæрдæ дарæн ис.
Хъайтыхъты Тамарæ,
РЦИ-Аланийы национ политикæ æмæ æддагон бастдзинæдты министры уынаффæгæнæг, Дзæуджыхъæуы Æхсæнадон советы нымæрдар
