РЦИ-Аланийы Хицауады Сӕрдары хӕдивӕг Иринӕ Азимова дзы сӕрдариуӕг кодта, афтӕмӕй уыд Цӕгат Ирыстоны бонмӕ цӕттӕгӕнӕг комитеты радон ӕмбырд.
Зындгонд куыд у, афтӕмӕй уыцы дзыллон бӕрӕгбоны мадзӕлттӕ цӕудзысты Дзӕуджыхъӕуы 21 ӕмӕ 22 сентябры. Уыимӕ, уӕд бӕрӕггонд цӕудзысты Ирыстон Уӕрӕсеимӕ баиуы 245 азы, Дзӕуджыхъӕуы 235 азы ӕмӕ Цӕгат Ирыстоны автономон республикӕйы сарӕзты 95 азы бӕрӕгбӕттӕ дӕр.
Уыцы ахсджиаг цаутимӕ баст бӕрӕгбоны архайджытӕ суыдзысты ӕрмӕст дзӕуджыхъӕуккӕгтӕ нӕ, фӕлӕ республикӕйы ӕппӕт районты цӕрджытӕ дӕр. Фарст афтӕ ӕвӕрд цӕуы, цӕмӕй бӕрӕгбоны культурон ӕмӕ хиирхӕфсӕн мадзӕлттӕ цымыдисаг уой, куыд хистӕр кары адӕмӕн, афтӕ фӕсивӕд ӕмӕ сывӕллӕттӕн дӕр.
Комитеты уӕнгтӕ рагагъоммӕ бацӕттӕ кодтой бӕрӕгбоны мадзӕлтты пълан ӕмӕ йӕ ӕрӕджы РЦИ-Аланийы Хицауады Сӕрдар сфидар кодта. Ныр цӕттӕгӕнӕг комитеты уӕнгтӕ бӕстон ӕркастысты, пъланы мадзӕлттӕ ӕххӕст кӕнгӕйӕ, алкӕцы министрад ӕмӕ ведомствӕмӕ дӕр цы хӕстӕ хауы, уыдонмӕ. Иринӕ Азимова ӕппӕт чиновниктӕм дӕр фӕсидт, цӕмӕй пъланыл бӕстон бакусой — уымӕй бирӕ аразгӕ уыдзӕн, бӕрӕгбоны мадзӕлттӕ цас зӕрдӕмӕдзӕугӕ рауайдзысты, уый.
Куыд нысангонд цӕуы, афтӕмӕй Республикӕйы боны кадӕн мадзӕлттӕ райдайдзысты 21 сентябры Къесайы-фырты уынджы фӕлладуадзӕн тӕлмы. Уым арӕзт ӕрцӕудзысты ирон чъириты фестивал, сувениртӕ ӕмӕ ӕндӕр аивадон куыстыты равдыст-армукъатӕ, ӕрмдӕсныты мастер-класстӕ, концерттӕ, физкультурон-спортивон ерыстӕ ӕмӕ ӕндӕр дзыллон мадзӕлттӕ.
22 сентябры бӕрӕгбоны мадзӕлттӕ адарддӕр уыдзысты Хетӕгкаты Къостайы номыл Центрон фӕлладуадзӕн парчы. Уым цы мадзӕлттӕ уыдзӕн, уыдонӕй иу у национ культурӕты фестивал «Хӕлардзинады горӕт». Республикӕйы боны кадӕн мадзӕлттӕ 22 сентябры цӕудзысты Сабырдзинады проспекты, Штыб ӕмӕ Адӕмты хӕлардзинады фӕзты, стӕй ӕндӕр бынӕтты.
РЦИ-Аланийы Сӕргълӕууӕджы
ӕмӕ Хицауады пресс-службӕ
