Ирыстоны дзырдаивадимæ чидæриддæр йæ цард сбаста, уыдонæй алкæмæн дæр зынаргъ æмæ уарзон у дзæнæты бадинаг, ЦИПУ-йы журналистикæйы факультеты кафедрæйы сæргълæууæг, профессор, УФ-йы уæлдæр скъолайы сгуыхт кусæг Къомайты Риммæйы ном. Уый æрæджы фæхъуыд не ‘хсæнæй. Йæ номæн æмæ йын йæ удварнæн кад кæныны нысанимæ, фидæны журналистты йæ зонадон куыстытимæ хуыздæр зонгæ кæныны нысанимæ, ЦИПУ-йы ахуыргæндты советы æмæ журналистикæйы факультеты разамынды уынаффæйæ знон ацы ахуыргæнæндоны ахуыргæндты советы залы байгом регионалон наукон-практикон конференци «Профессор Къомайты Риммæйы номыл I регионалон зонадон бакастытæ». Архайдтой дзы университеты разамынд, ахуыргæндтæ, аспиранттæ, студенттæ.
Конференци цыбыр раныхасæй байгом кодта ЦИПУ-йы президент Мæхæмæтты Ахуырбег. Уый фæстæ конференцийы архайджытæ иу уысм æдзæмæй алæугæйæ ссардтой зындгонд профессоры рухс ном. Конференци амонæг журналистикæйы факультеты декан Хæбæлаты Фатимæ ныхасы бар радта Риммæйы хорз чи зыдта, уыцы ахуыргæндтæн. Уыдон мысыдысты йæ удыхъæды фæзминагдæр миниуджыты. Йæ зонадон æмæ рухсадон архайды ахадындзинады тыххæй сæ хъуыдытæ æмæ зæрдæбын ныхæстæ загътой ЦИПУ-йы профессортæ, филологон наукæты доктортæ Гуæцæлты Ларисæ, Борис Кунавин, педагогон наукæты доктор, профессор Тахохты Барис, Цæгат Ирыстоны адæмон поэтессæ Гуырдзыбегты Иринæ, УФ-йы сгуыхт æмæ РЦИ-Аланийы адæмон нывгæнæг, зындгонд скульптор Дзбойты Михал, филологон наукæты кандидат, республикон газет «Цæгат Ирыстон»-ы сæйраг редактор Битарты Маринæ.
Конференци саразджытæн хиуæтты номæй зæрдиаг арфæ ракодта газет «Рахизфарсы цард»-ы сæйраг редактор Къомайты-Бокоты Лидæ. Пленарон æмбырды фæстæ конференцийы архайджытæ сæ куыст дарддæр кодтой зонадон секциты. Студенттæ дзы журналистикæйы æмæ педагогикæйы фарстаты фæдыл бакастысты мидисджын докладтæ.
Сæрмагондæй конференцимæ ЦИПУ-йы ахуыргæндты советы залы арæзт æрцыд профессор Къомайты Риммæйы царды æмæ зонадон, рухсадон архайдыл дзурæг æрмæджыты равдыст. Наукæйы æнувыд зиууоны, фæлтæрты цæстуарзон хъомылгæнæджы Къомайты Риммæйы номыл ахæм наукон форум арæзт цæудзæн æрвылаз дæр.
ГАСАНТЫ Валери
