Ацы бонты хъæууонхæдзарадон куыстуæттæ æфснайынц фæззыгæнд хортæ. «Зымæджы дæндаг дур кæрды» — ахæм æмбисонд баззад нæ куырыхон хистæртæй, æмæ, Хуымæллæджы хъæуы Плиты Иссæйы номыл колхозы зæхкусджытæн цы уыдзæн сæ къæбицы, уый базоныны фæдыл хæдзарады быдыртыл æрзылдыстæм.
Колхозы ис æппæт техникон фæрæзтæ, немыцаг нæмыгæфснайæн комбайн «CLAAS KGaA GmbH», трактортæй райдай æмæ зайæгойтæ, мæрмæ зилæн агрегаттæй фæу. Æрвылаз искæмæй техникæ æфстау курыны бæсты хæдзарады сæрдар Кæсæбиты Барис бацархайдта ацы фарста сæхи пайдайæн алыг кæныныл, кæд зынаргъ слæууыд сæ балхæныны аргъ, уæддæр сæ æрвылазон хаццоныл ноджы фылдæр фæрæзтæ хардзгонд цыдис.
Хæдзарады хыгъдхæссæг Дзгойты Таймураз нын куыд радзырдта, афтæмæй уал хуымæллæггæгтæ ныридæгæн æфснайд фесты хъæбæрхор цыппор гектары фæзуаты. Ацы бонты йын йæ хъæмпæй бæстытæ аразынц. Хæдзарады фæллойгæнджытæ ныртæккæ хъацæнтæ хæссынц сояйы хуымтæм — ахсынц æстай гектары. Нартхоры хуымты 750 гектары дæр цъæх-цъæхид дарынц, зæрдæ сæм райы. Цыппар сыфы куы фæзыны ацы культурыл, уæд уыцы сыфты бафсадын фæхъæуы минералон хъацæнтæ тæнгъæды хуызы. Уыцы куыст фæдзæхст у механизатор Къудухты Алыксандрæн, æмæ хъазуатонæй архайы пырхгæнæн агрегатæй. Нартхоры хуымты зæхмæ та уыцы-иу рæстæг минералон хъацæнтæ хæссынц æртæ тракторæй Бигъаты Хъазыбег, Гуыдиаты Руслан æмæ Киситы Руслан. Куысты хæрзхъæддзинадмæ йæ цæст иудадзыг дары бригады сæргълæууæг, дæсны хъæууонхæдзарадон специалист Бызыккаты Феликс.
Колхозы быдыртæ алы рæтты сты, сæ дзæвгар хай ис, Туацъæ кæй хонынц, уыцы ран. Хæринаггæнæгæй хæдзарады къорд азы кусы Цæлойты Фатимæ — æппæт фадæттæ дæр ын ис, йæ авналæнтæ уæрæх сты. Æрыгон сылгоймаг тынг хæрзад хæринаг скæны æрвылбон, æмæ йæ тæвдæй бахæццæ кæнынц, куыстытæ кæм фæцæуынц, уыцы бынæттæм.
Зæгъын ма хъæуы уый, æмæ Кæсæбиты Барис зæрдиагæй кæй ауды фæллойгæнджытыл. Мызды уæлæмхас, цы хор æрзайы, уымæй сын дзæвгар хай ракæны. Мыздæй дæр хъаст нæ кæнынц, цас исынц, зæгъгæ, сæ куы бафарстам, уæд хъазгæмхасæнты дзуапп радтой, «коммерцион сусæгдзинад», дам, у, фæлæ хъæстаг не стæм, нæ хъиамæтæн, дам, нын аккаг аргъ кæнынц.
ГАПБАТЫ Алетæ
