Саухал цады ихы сæрыл иу æнæзонгæ лæджы æнгуыр даргæ баййæфта. Нæлгоймаг чысыл бандоныл бады æмæ æнгуыры къæбæлмæ æдзынæг кæсы.
— Хорз лæг, бирæ ахсай, — дзуры йæм Саухал.
— Дæуæн дæр мæ цæст уарзы бирæ кæсаг æрцахсын.
— Æввахс дæм æрбадон æви дард?
— Куыд дæ фæнды, афтæ, — лæг æнгуыр сриуыгъта æмæ егъау хуыдзых, тыбар-тыбур кæнгæйæ, ферттывта хуры тынтæм.
Саухал чысыл дæлдæр æрбадт. Йæ æнгуырыл фиуы мур бакодта æмæ йæ ихы хуынчъы ауагъта.
Цасдæры фæстæ æнгуыры къæбæл базмæлыд.
Саухал æнгуырыл æрбахæцыд, иучысыл цъингуыр стæлфыд йæ армы.
— Донбеттыртæ, уæ хорзæх раттут, — бахъæлдзæг Саухал æмæ та æнгуыр ногæй ауагъта ихы бынмæ.
— Уый дын кæсаг, гъе, — фырцинæй йæхи нал баурæдта Саухал. Дыккаг кæсаг ахæм стыр уыд, æмæ æнгуыры бос фæцæйтыдта.
Изæрмæ дзæвгар кæсæгтæ æрцахста Саухал, фæлæ, йæ фарсмæ бадæгмæ куы бакаст, уæд хорзау нал фæцис — уымæн йæ кæсæгты кæри уыдис дыууæ хатты стырдæр.
Саухал цæуылдæр ныхъхъуыды кодта… Йæ тамакойыл зынг бафтыдта æмæ лæгмæ дзуры:
— Цæй æмæ хæснаг скæнæм…
— Цавæр хæснаг? — дис каст æм кæны лæг.
— Нæ иугай къæхтæ доны ауадзæм, æмæ йæ уым фылдæр чи фæдара, уый фæуæд нæ дыууæйы кæсæгтæ дæр.
— Хæснаг никуы фæкæнын, фæлæ дæ кæд тынг фæнды, уæд разы дæн, — йæ мидбылты бахудт æнæзонгæ лæг.
— Тынг мæ фæнды! Нæ къахыдарæс дæр æмхуызон — нæ дыууæйыл дæр нымæт дзабыртæ.
— Гъемæ, райдайæм уæдæ, — лæг йæ рахиз къах ихджын доны ауагъта. Саухал дæр æй бафæзмыдта.
Иуцасдæры фæстæ Саухалы къах, цыма дзы сæдæгай судзинтæ тъыссынц, цыма йын æй исчи къуымых хырхæй лыг кæны, афтæ срыст, фæлæ быхсы. Йæ сырх фындз цъæх-цъæхид афæлдæхт, цыхцырæг фестад. Дæндæгтæ кæрæдзиуыл сæхи схостой…
Бакаст лæгмæ æмæ — диссаг! Уымæн йæ къах доны кæй ис, уый хъуыды дæр нæ кæны. Йæ æнгуыр ма донмæ дæр баппæрста.
— Амбылд-д-д-тай, — йæ къах донæй фелвæста
Саухал æмæ йæ ихыл хойы, ихæнриз кæны.
— Ницы дæ амбылдтон, — лæг йæ дзыппæй хæрынкъа систа æмæ йæ йæ фатхъулы ныссагъта.
— Сийгæ дын бакодта? — йæ цæстытæ дзагъырæй баззадысты Саухалæн.
— Куыд хъуамæ басийа хъæдын къах? Мæхи къах хæсты быдыры ныууагътон.
— Бахатыр кæ-æ-æн…
— Цы мæ курыс хатыртæ? Ницæмæй мæ бафхæрдтай, фæлтау кæрæдзи базонæм.
— Стыр æхсызгонæй! — Саухал лæджы йæ хъæбысы ныккодта.
СЛАНТЫ Руслан
