Зындгонд куыд у, афтæмæй министртæ æмæ æндæр ведомствæты
разамонджытæ аразынц фембæлдтытæ районтæ æмæ хъæуты цæрджытимæ. Кæй зæгъын æй хъæуы, ахæм хорз хъуыддаг арæзт цæуы нæ респуб-ликæйы Сæргълæууæг Сергей Меняйлойы хъæппæрисæй, семæ ссис фæткон.
Ахæм фембæлд уыд æрæджы Уæллаг Фыййагдоны. Комбæсты цæрджытæн фадат уыд сæ курдиæттимæ РЦИ-Аланийы ахуырад æмæ наукæйы министр Алыбегты Эллæмæ ‘рбацæуынæн. Дзæвгар адæм æрбамбырд бынæттон хиуынаффæйады сæргълæу-уæджы кусæн уатмæ министримæ фембæлдмæ, алкæй дæр æм фæндыд йæ курдиатимæ бахатын. Алыхуызон уыдысты куырттатæгты курдиæттæ. Мæн дæр бафæндыд Ахуырад æмæ наукæйы министримæ фембæлын. Йæ адæймагдзинад мæ дзурынмæ фæныфсджын кодта. Фыццаджыдæр, ирон æгъдау куыд амоны, афтæ мын сыстад æмæ мын «æгас цу» загъта. Æз ын, кæй зæгъын æй хъæуы, арфæ ракодтон. Бузныг ын загътон, ахуырады къабазы йæ архайд ахадгæ кæй у, мадæлон æвзаджы рæзтмæ æмбæлгæ цæстдард кæй ис, уый тыххæй, æмæ йæм бахатыдтæн, цæмæй нæ республикæйы скъолаты ахуыргæнджытæ æмæ ахуырдзаутæ се ‘ргом раздахой нæ иунæг адæмон газет «Рæстдзинад»-мæ, цæмæй ахуыргæнджытæ, кълæсты разамонджытæ исой æмæ кæсой газет «Рæстдзинад», сæ хъомыладон куысты пайда кæной нæ ирон газеты æрмæджытæй, сæ хъус дарой, ахуырдзау-тæ газет куыд кæсынц, уымæ. Ахæм уагæвæрд стыр ахъаз уаид мадæлон æвза-джы рæзтæн. Рæзгæ фæлтæрæн сæ миддуне зынгæ фæхъæздыгдæр уаид. Уæдæ нæ удварны хæзнатæ дæр сæ гаччы сбадиккой. Нæ адæмон газетæн дæр йæ тираж бæлвырд фæфылдæр уаид.
Министр мæм лæмбынæг байхъуыста æмæ мæ курдиат йæхимæ фæбæрæг кодта. Ацы фембæлды фæстæ æз æппындæр дызæрдыг нæ кæнын, мæ курдиатыл министр йæ дæлбартимæ бæстон кæй æрныхас кæндзысты. Гъемæ рæстмæ уæнт сæ хъуыдытæ, сæ архайд!
Фæрниаты Рая,
педагогон фæллойы ветеран
