РЦИ-Аланийы Сæргьлæууæг Сергей МЕНЯЙЛОЙЫ разамындæй уыд республикон организацион комитет «Уæлахиз»-ы радон æмбырд. Комитеты уæнгтæ æркастысты Уæлахизы 80 азы кадæн мадзæлттæ цæттæ кæныны фарстатæм.
Фембæлды райдайæны республикæйы разамонæг фæсидт æппæт профилон ведомствæты минæвæрттæм, цæмæй бæстон бакусой бæрæгбоны мадзæлттыл, уæлдай æргом аздахой дзыллон акциты æдасдзинадмæ. Куыд загъдæуыд, афтæмæй ацы хатт акци «Æнæмæлгæ полкъ» арæзт æрцæудзæн Сæрибары фæзы (зындгонд куыд у, афтæмæй фæстаг цалдæр азы ацы мадзал арæзт цыд онлайн-фæткы бындурыл).
Цæгат Ирыстоны Хицауады Сæрдары хæдивæг Платы Альбинæ бæстон радзырдта Уæлахизы 80 азимæ баст мадзæлтты пъланы тыххæй. Йæ ныхасмæ гæсгæ, бæрæгбоны кадæн а уалдзæг республикæйы арæзт æрцæудзæн сæдæйæ фылдæр егъау номарæн-рухстауæн мадзалæй фылдæр.
– Бæрæгбоны мадзæлтты пъланы сæйрагдæр, æнæмæнг, суыдзæн 9 Майы æфсæддон парад (уый иумæйаг хъарутæй цæттæ кæнынц 58-æм уæрæсейаг æфсад æмæ Дзæуджыхъæуы администраци). Уымæй уæлдай, республикæйы сæйраг горæт æмæ районты цæудзысты номарæн æмбырдтæ, литературон-музыкалон фембæлдтытæ, спектакльтæ, равдыстытæ… Æмæ уыцы мадзæлттæн сæ зынгæ хай ныридæгæн æххæстгонд цæуы. Зæгъæм, ацы бонты скъолатæ æмæ иннæ ахуырадон кусæндæтты кæнынц Лæгдзинады уроктæ, Фыдыбæстæйы Стыр хæсты историимæ баст æндæр фембæлдтытæ. Ныридæгæн райдыдтой акцитæ «Хъæбатыры номыл уынг», «Фыстæджытæ фронтæй», хæстæгдæр бонты та – «Георгийы лент», «Сæ цæсгæмттæм сын бакæс» æмæ иннæтæ. Скъоладзаутæ æмæ фæсивæд цымыдисæй зонгæ кæнынц «Уæлахизы поезд» æмæ æндæр цæугæ æмæ стационарон экспозициты æрмæджытимæ. Зæгъæм, абоны онг ахæм хæстон равдыстытæ бабæрæг кодтой 4,5 мин адæймагæй фылдæр, – радзырдта Платы Альбинæ.
Хицауады Сæрдары хæдивæджы ныхасмæ гæсгæ, республикæйы æфсæддон мемориалтæ æмæ хæстонты æфсымæрон ингæнтæ æмæ алфамбылай фæзуæттыл 1 маймæ хъуамæ ахицæн уой фæлгонцадон куыстытæ.
Уæлахизы бонмæ цæттæгæнæн мадзæлтты фæдыл докладтæ скодтой РЦИ-Аланийы Нымæцон рæзты комитеты сæрдар Гахаты Даниил, 58-æм æфсады бæрнон афицертæ, республикон министрадтæ æмæ ведомствæты минæвæрттæ.
РЦИ-Аланийы Сæргълæууæг æмæ Хицауады пресс-службæ
