Сырх Тырысайы орденхæссæг Калоты Георгийы номыл Дзæуджыхъæуы бирæкъабазджын техникумы фæзындис цæрæнуатон-коммуналон хæдзарады къабазæн специалисттæ цæттæ кæнынæн ног гæнæнтæ.
РЦИ-Аланийы цæрæнуатон-коммуналон хæдзарады министры фыццаг хæдивæг Бокоты Витали бабæрæг кодта бирæкъабазджын техникум. Федта сæ уавæртæ, ныхас кодта æмгуыстады фарстатыл. Фидæны абитуриенттæм ног ахуыры аз ам æнхъæлмæ кæсы ног дæсныйæдтæ. Зæгъæм, сæ номхыгъды ныр уыдзæнис уæзæгтæ исæн машинæйы техникон эксплуатацийы, стæй донуадзын æмæ дон-
æфсисады специалисттæ. Фидæны пъланты ис лифтер-электромеханиктæ цæттæ кæныны программæ дæр. Ахæм дæсныйадыл нæ ахуыр кæнынц сыхаг регионты дæр. Афтæмæй сæ лæггад у æрвылбон тынг ахсджиаг.
Бокоты Витали æрзылдис ахуырадон фæзтыл, разыйæ баззад куыд цæттæ кæнынц электрикты, æндадзджыты, сантехникты æмæ æндæр специалистты. Ахуыргæнджытимæ йын рауад бæрнон ныхас.
– Цæгат Ирыстоны куыст цæуы цæрæнуатон-коммуналон хæдзарады æнæкъуылымпы райрæзты программæйыл. Æхсызгон нæ хъæуы æрыгон специалисттæ, уымæн æмæ цард нæ размæ æвæры ног нысантæ, нырыккон кусæнгæрзтæ фæзынд æмæ сæм сарæхсдзысты нæ фæсивæд, – фæнысан кодта министры фыццаг хæдивæг.
– Дзæуджыхъæуы бирæкъабазджын техникум цæттæ кæны ахæм профессионалты, зæрдæмæдзæугæ сты сæ фидæны нысантæ. Бахъуаджы заман æххуысмæ дзур-
дзыстæм студенттæм сæ практикон ахуырты рæстæг, рауагъдонтæм, техникумы сæрмагонд техникæ дæр-иу хъæудзæнис. Хуымæтæджы ацы аз бирæкъабазджын техникумы нæ ацыдис профессионалон дæсныдзинады чемпионат æмæ бæрзонд технологиты чемпионаты регионалон къæпхæн. Студенттæ рамбылдтой 19 призон бынаты. Фыццæгтæ уыдысты номинацитæ «Æндадзæг», «Сантехник», «Ахорæг», «Къулсæрдæг» æмæ «Хилдасæг»-ы. Уæлахиздзаутæ Ирыстоны номæй сæ арæхстдзинад æвдисдзысты æппæтуæрæсеон чемпионаты.
Техникумы директор Дзгойты Станиславы хъуыдымæ гæсгæ, ахсджиаг у, цæмæй æрыгон специалисттæ нæхи республикæйы кусгæйæ баззайой:
– Хъуамæ мах архайæм, цæмæй нæ чызджытæ æмæ лæппутæ ахуыры фæстæ кусой æмæ пайда хæссой нæ республикæйæн æмæ сæхицæн дæр, исой аккаг мызд.
Бадзырдтæ бафыссæм алыхуызон арæзтадон организацитимæ æмæ куыстуæттимæ. Дарддæр сын куысты бынæттæ кæм ратдзысты, ахæм рæтты практикæ кæнын райда-
йынц дыккæгæм курсы.
Гугкаты Жаннæ
